फेरि पनि कोरोना संक्रमणको महामारीको संकेत देखियो, सतर्कता अपनाउन आग्रह

काठमाडौं । संक्रामक रोग विशेषज्ञ डा. अनुप सुवेदीले फेरि पनि कोरोना संक्रमणको महामारीको संकेत देखिएको बताएका छन् । कोभिडका विरामीको संख्या र स्थिति देख्दा यस्तो संकेत देखिएको उनको भनाइ छ ।

विगत केही दिनमा सभा-सम्मेलन, बिहे, भोजमा संक्रमित भएर हप्तादिन जति पछि अस्पताल जाने, भर्ना हुने क्रम बढ्न थालेको देखिएको उनले बताएका छन् । उनले स्वास्थ्य मापदण्डको कडाइका साथ पालना गर्न र एन-९५ वा सो सरहको मास्क हरबखत लगाउन आह्वान गरेका छन् ।

बिहेबारी, भोजभतेर, सभा(सम्मेलनबाट सकेसम्म टाढै बस्न आग्रह गर्दै सुुवेदीले परिवारको कसैलाई सामान्य रुघा वा खोकी वा हल्का ज्वरो मात्र वा जुनसुकै कोरोनासँग मिल्न सक्ने लक्षण छ भने पनि तुरुन्त पिसिआर जाँच गराउन आग्रह गरेका छन् ।

‘उच्च जोखिम समूहका व्यक्तिमा पहिले कोभिड संक्रमण भएर वा खोप लगाएर बनेको रोग प्रतिरोधी क्षमतामा केही महिनापछि ह्रास आउने गरेको देखिएको छ,’ डा. सुवेदीले सामाजिक सन्जालमा लेखेका छन्, ‘ओमिक्रोन देखिएपछि त त्यस्तो लहर झन् चाँडो आउने र डेल्टा मात्रको लहरभन्दा ठूलो हुने पनि सुनिश्चित जस्तै भएको छ ।’

डा. सुवेदीले सार्वजनिक गरेको धारणा यस्तो छ
विगत १-२ दिनमा देखिन थालेका कोभिडका बिरामीको संख्या र स्थिति देख्दा हामी अर्को उभारको सँघारमा उभिएका छौं जस्तो देखिन्छ ।

ओमिक्रोन देखा नपर्दै पनि डेल्टा भेरिएन्टले नै पनि हिउँदमा फेरि अर्को -अघिल्लो भन्दा सानो) उभार ल्याउने अपेक्षित थियो । त्यसको मुख्य कारण उच्च जोखिम समूहका व्यक्तिमा पहिले कोभिड संक्रमण भएर वा खोप लगाएर बनेको रोग-प्रतिरोधी क्षमतामा केही महिनापछि ह्रास आउने गरेको देखिएको छ ।

ओमिक्रोन देखिएपछि त त्यस्तो लहर झन् चाँडो आउने र डेल्टा मात्रको लहर भन्दा ठूलो हुने पनि सुनिश्चित जस्तै भएको छ ।

त्यो ओमिक्रोनको लहर अघिल्लो -दोस्रो) लहरजस्तै ठूलो वा उस्तै हताहती गराउने हुन्छ कि केही सानो, कम क्षति गराउने हुन्छ ? भन्ने मात्र अहिल्यै अनुमान गरिहाल्न सकिंदैन ।

विगत केही दिनमा विशेष गरी सभा-सम्मेलन, बिहे, भोजमा संक्रमित भएर हप्तादिन जति पछि अस्पताल जाने, भर्ना हुने क्रम बढ्न थालेको देखिन्छ । यो डेल्टाकै पहिलेदेखिकै अपेक्षित हिउँदे उभार हो कि यसमा केही मात्रामा ओमिक्रोनको पनि देन छ, सरकारको जिनोम सिक्वेन्सिङ अध्ययनले मात्र त्यो बताउँछ । तर मूल कुरो, सबै फेरि एकदम सतर्क हुनुपर्छ ।

बिहेबारी, भोजभतेर, सभा-सम्मेलनबाट सकेसम्म टाढै बस्नुहोला । घरबाहिर निस्केको बेलामा घरका सबै सदस्यले सकेसम्म एन-९५ वा सो सरहको मास्क हरबखत लगाउनुहोला । आफूले स्कुल पठाएका केटाकेटीहरूलाई पनि त्यसो गर्न सिकाउनुहोला ।

मास्क लगाउँदा, मास्कको छेउ वा तलमाथिबाट हावा ननिस्कने गरी अनुहारमा टपक्क मिल्ने मास्क मात्र लगाउनुपर्छ । त्यस्तो मास्क नभेटिएमा बरू टपक्क मिल्छ भने एन-९५ मास्क र सर्जिकल मास्क वा सर्जिकल र कपडाको मास्क, आदि २ थरी मास्क एकैचोटी लगाउने गर्नुपर्छ ।

यो युट्युब भिडियो लिंकमा देखाइए झैं मास्कको दुई छेउमा गाँठो र मुजा पारेर लगाउँदा पनि मास्कलाई तपाईंको अनुहारमा उपयुक्त तरिकाले टपक्क बस्ने बनाउन सकिन्छ ।

०००

भेन्टिलेशन राम्रो नभएको बन्द कोठा वा ठाउँमा अरू व्यक्तिसँग मास्क लगाएरै पनि सकेसम्म नबस्नुहोला । सकेसम्म भेटघाट र विशेष गरी अरु व्यक्तिसँग खानपान, बाहिर खुला ठाउँमा मात्रै गर्नुहोला ।

परिवारको कसैलाईसामान्य रुघा वा खोकी वा हल्का ज्वरो मात्र वा जुनसुकै कोरोनासँग मिल्न सक्ने लक्षण छ भने पनि तुरुन्त पिसिआर जाँच गराउनुहोला । अनि रिपोर्ट नआउन्जेल घरका अरु कोही पनि सदस्य कार्यालय, स्कुल वा बाहिर कतै नजानुहोला ।

यदि घरको एक जनाको मात्र पिसिआर पोजिटिभ देखियो भने पनि पोजिटिभ हुने त छुट्टै बस्नै पर्यो, बाँकी अरुले पनि क्वारेन्टिनका सबै नियमको पालना सकेसम्म गर्नुहोला ।
सकेसम्म आफू पनि छुट्टै बस्ने, एकै कोठामा बस्दा सकेसम्म मास्क लगाउने, सँगै खाना नखाने, ७-१० दिनमा पिसिआर गर्ने गर्नुहोला ।

कसैले खोप लगाउनुभएको छैन भने तुरुन्त सरकारले दिएको खोप लगाउन गइहाल्नुहोला ।

जतिसुकै महिनाका गर्भवती, स्तनपान गराउने आमा, जुनसुकै दीर्घरोग हुने वा औषधी खाने सबैले कोभिड विरुद्ध सरकारले उपलब्ध गराएको जुनसुकै खोप पनि लगाउन सुरक्षित छ र लगाउनुपर्छ ।

सबैजना आफू जोगिऊँ, अरुलाई जोगाऔं ।