रातो कारमा ३ क्वीन्टन गाँजासहित धनकटाको भेडेटारमा १ जना पक्राउ

धनकुटाको साँगुरीगढी गाउँपालिका वडा नं. –६, कामफेक छेउमा ३ क्वीन्टन गाँजासहित कारमा सवार १ जना पक्राउ परेका छन् ।

इलाका प्रहरी कार्यालय भेडेटारले हिजो राती जाँचका क्रममा को १ च ३४७८ नम्बरको कारभित्र कालो प्लाष्टिकले १० पोकामा बेरेर राखिएको ३ क्वीन्टन गाँजा बरामद गरिएको जिल्ला प्रहरी कार्यालय धनकुटाका डिएसपी तथा प्रवक्ता ओमप्रकाश खनालले जानकारी दिए ।

इलाका प्रहरी कार्यालयबाट खटिएको टोलीले भेडेटार रवि–राँके सडकखण्डमा प्रहरी नायव निरीक्षक रमेश प्रधानको टोलीले चेकिङको क्रममा रातो कारभित्र कालो प्लास्टिकले बेरेर पोका पारेको १० पोका गाँजा बरामद गरेको जनाइएको छ ।

सो कारभित्र रहेको गाँजा ३० केजीको दरले पोको पारिएको दस वटा पोकामा लुकाएर राखिएको अवस्थामा गाँजा फेला परेको प्रहरीले जनाएको छ । गाँजासहित कारमा सवार मोरङ जिल्ला विराटनगर महाननगरपालिका १५ का २६ वर्षीय प्रिन्सकुमार साहलाई नियन्त्रणमा लिइएको छ । कार चालक फरार रहेकोले खोजतलास भइरहेको प्रहरीको भनाइ छ ।