भीमनारायण गोल्ड कप : बेलबारीको आत्मघाती गोलको सहाराले सेमिफाइनल पुग्यो एपिएफ क्लब

धनबुटा । धनकुटामा जारी सहिद भीमनारायण गोल्ड कपको १७ औं शृंखला अन्तर्गत आज भएको खेलमा विभागीय टोली एपिएफ क्लब सेमिफाइनल प्रवेश गरेको छ ।

धनकुटाको तल्लो टुढिखेलमा चैत १७ गतेदेखि जारी १७ औं शृंखला अन्तर्गत बेलबारी फुटबललाई ३–२ गोलअन्तरमा पराजित गर्दै विभागीय टिम एपिएफ क्लब सेमिफाइनल प्रवेश गरेको हो ।

निर्धारित नब्बे मिनेटको समयमा २–२ को बराबरी अवस्थामा रहेको थियो । अतिरिक्त चार मिनेट थप गरिएको समयमा बेलबारीका तर्फबाट आत्मघाती गोलसँगै विभागीय टिम एपीएफ सेमिफाइनल पुग्ने भाग्यमानी टीम बनेको छ ।

खेलको सुरुवाती ७ मिनेट मै एपिएफका टिम क्याप्टेन हरि कार्कीले गोल गर्दै टिमलाई अग्रता दिलाएका भने खेलको ३३ औं मिनेटमा युवराज खड्काले १ गोल थप्दै २–० को गोलअन्तर बनाएका थिए ।

त्यसको ३ मिनेटमा बेलबारी निक्कै चमत्कारकि खेल खेलेको थियो । खेलको ३६ औं मिनेटमा बेलबारीका तर्फबाट भुवन बस्नेतले गोलपोष्ट नजिकैबाट प्रहार गरेको बलले जाली चुम्यो । पहिलो हाफको थप समयको ४६ औं मिनेटमा बेलबारीका तर्फबाट विदेशी खेलाडी डानियलले टिमका लागि गोल थप्दै खेल बराबरी ल्याए ।

निर्धारित ९० मिनेटको समय सकिएर थप गरिएको ४ मिनेटको अन्तिम क्षणमा खेल पुनः एपिएफएको कब्जामा रह्यो । अन्तिम क्षणमा एपिएफका खेलाडीको कसिलो हेडिङ रोक्न खोज्दा बेलबारीका बिकु राईसँग ठोक्किएको बल आफ्नै पोष्टमा छिर्दै आत्मघाती गोल हुन पुग्यो । अन्तिम समयमा भएको आत्मघाती गोल नै एपिएफले सेमिफाइनलसम्मको यात्रा तय गर्ने आधार बनेको छ ।

आजको म्यान अफ दि म्याच विजेता टिम एपिएफका युवराज खड्का घोषित हँदा उनले नगद पाँच हजार नगद पुरस्कारहात पारेका छन् ।
भोली झापाको युनाइटेड युथ क्लव र सप्तरीको नमोबुद्ध फुटवल क्लाबीच पहिलो सेमिफाइलन खेल हुने आयोजक सहिद भीम नारायण स्मृति प्रतिष्ठानले जनाएको छ ।

चैत २३ गतेसम्म सञ्चालन हुने प्रतियोगिताको विजेताले नगद ५ लाख रुपैयाँ र उप विजेताले २ लाख ५० हजार रुपैयाँ पुरस्कार पाउने आयोजकले जनाएको छ । प्रतियोगितामा जम्मा आठ टिमको सहभागिता रहेको छ ।