एपीएफलाई हराउँदै गाइघाट पुग्यो भीमनारायण गोल्डकपको फाइनल, उपाधीका लागि नमोबुद्धसँग भिड्ने

धनकुटा । उदयपुरको गाइघाट फुटबल क्लब धनकुटामा जारी १७ औं संस्करणको सहिद भीमनारायण गोल्डकपको उपाधि नजिक पुगेको छ ।

आज भएको अन्तिम सेमिफाइनलमा विभागीय टीम सशस्त्र प्रहरीको एपीएफ फुटबल क्लबलाई २–१ गोल अन्तरले पराजित गर्दै गाइघाट फाइनल प्रवेश गरेको हो ।

धनकुटाको तल्लो टुढिखेलमा भएको सनसनीपूर्ण खेलमा खेल सुरु भएको एक मिनेट बित्न नपाउँदै एपीएफका युवराज खड्काले गोल गरेर टिमको खाता खोलेका थिए । मध्यान्तरअघिसम्म एपीएफले १–० को अग्रता कायम राख्न सफल भए पनि खेलको ६० औं मिनेटमा गाइघाटका किस्मत लिम्बुले गोल गर्दै खेललाई १–१ को बराबरीमा ल्याए । ७० औं मिनेटमा गाइघाटकै रितेश तामाङले दिएको पासलाई सदुपयोग गर्दै विदेशी खेलाडी फोफोनाले हेडमार्फत गोल गरेर गाइघाटलाई २–१ गोलको अग्रता दिलाए ।

त्यसपछि थप गोल हुन नसक्दा गाइघाट फाइनल प्रवेश गरेर उपाधि नजिक पुगेको हो । गाईघाटका गोलकर्ता फोफोना खेलको म्यान अफ दी म्याच घोषित भए । उनलाई नगद ५ हजार पुरस्कार प्रदान गरिएको छ ।

भोली उपाधिका लागि गाइघाट र नमोबुद्ध क्लब सप्तरी प्रतिष्पर्धा हुने भएको छ । विहीबार भएको पहिलो सेमिफाइनलमा बिर्तामोड युनाइटेडलाई ३–१ गोल अन्तरले पराजित गर्दै नमोबुद्ध फाइनल प्रवेश गरिसकेको छ ।

प्रतियोगिताका विजेताले नगद ५ लाख र उपविजेताले २ लाख ५० हजार रुपैयाँसहित ट्रफी मेडल, कप, प्रमाणपत्र हात पार्नेछन् । सबैभन्दा बढी गोल गर्ने, म्यान अफ द म्याच तथा सर्वोत्कृष्ट खेलाडीले पनि नगद पुरस्कार पाउने आयोजक सहिद भीमनारायण स्मृति प्रतिष्ठानले जनाएको छ ।