दीपक मनाङे औपचारिक रुपमा कम्युनिष्ट राजनीतिमा प्रवेश

काठमाडौं । मनाङ प्रदेश सभा ‘ख’ बाट स्वतन्त्र निर्वाचित प्रदेश सभा सदस्य दीपक मनाङे (राजीव गुरुङ) मंगलबारदेखि औपचारिक रुपमा कम्युनिष्ट राजनीतिमा लागेका छन् ।

गण्डकी प्रदेशका युवा तथा खेलकुद मन्त्रीसमेत रहेका मनाङेलाई मंगलबार आलोकनगरस्थित पार्टी केन्द्रीय कार्यालयमा महासचिव बेदुराम भुसाल सहितले स्वागत गरे । मनाङेलाई सोमबारै अध्यक्ष माधवकुमार नेपालले कोटेश्वरस्थित निवासमा पार्टी प्रवेश गराएका थिए ।

प्रदेश सरकारको पहिलो कार्यकालमा पनि एमाले नेता पृथ्वी सुब्बा गुरुङको सरकारमा मन्त्री बने । तर पछि गुरुङकै सरकार ढालेर कांग्रेसका कृष्ण चन्द्र पोखरेल नेपालीको सरकार बनाउन सघाएर त्यतै मिसिए । तर यस पटक एमाले, माओवादी र कांग्रेसमा लाग्दा लाभको पद नपाउने भएपछि उनी समाजवादीतिर लागेका हुन् ।

गण्डकीमा अहिलेसम्म समाजवादीका कुनै सांसद निर्वाचित भएका छैनन् । समानुपातिकबाट एक जना आउने सम्भावना छ । यस्तोमा मनाङे मन्त्री हुन नसके संसदीय दलको नेता बनेर सुविधा उपयोग गर्न पाउने छन् । यदि दलको नेता नबने उनी मन्त्री हुनेछन् । अध्यक्ष नेपालले उनलाई मन्त्री बनाउने सर्तमा भित्र्याएको स्रोतले जनाएको छ ।

मनाङेले आफू स्वतन्त्र रहनुभन्दा दलमा लागेर राजनीतिक गर्नु उचित ठानेकाले यो निर्णय लिएको पनि बताएका छन् । नेकपा (एकीकृत समाजवादी) प्रवेश गरेका मनाङेले पार्टी कार्यालयमा पत्रकार सम्मेलनमार्फत आफूलाई मुख्यमन्त्री दिएर पनि काम नभएको बताए ।

‘मन्त्री ठूलो कुरा होइन । मलाई ठूलो मन्त्री अफर गरेको थियो । तर, मैले युवा तथा खेलकुद मन्त्रालय रोजेँ । म मुख्यमन्त्रीमा दाबी गरेर काठमाडौं आएको होइन । मुख्यमन्त्री दिए पनि मलाई काम छैन । त्यसका लागि अनुभव चाहिन्छ । त्यसको अनुभव पनि छैन,’ उनले भने । मन्त्री नभए पार्टी नछोड्ने दाबी गरेका मनाङेले यदी पार्टी छोड्नुपरे राजनीतिबाट सन्यास लिने पनि बताए ।

‘मैले स्वतन्त्र रुपमा रही जनताको सेवा गर्ने निर्णय गरेको थिएँ। तर, परिवर्तित परिस्थितिमा एक्लै रहनुभन्दा राजनीतिक पार्टीको संगठनमा आवद्ध भई त्यसका नीति, विचार र सिद्धान्तबाट निर्देशित हुँदै त्यसको बलमा गरिने पहलकदमी तथा जनसेवा थप प्रभावकारी हुने निष्कर्षमा म पुगेको छु,’ उनले भने, ‘आजैका मितिदेखि नेपाल कम्युनिष्ट पार्टी (एकीकृत समाजवादी) मा आवद्ध हुँदै उक्त पार्टीको मार्ग निर्देशनअनुरुप जनसेवामा सक्रिय रहने कुरा सबैमा अनुरोध गर्दछु ।’