प्रधानमन्त्री देउवासँग अमेरिकी उपमन्त्री जियाको भेटवार्ता,  नेपाल र अमेरिकीबीचको सम्बन्ध तथा द्विपक्षीय हितको बारेमा छलफल 

काठमाडौँ । अमेरिकी नागरिक सुरक्षा लोकतन्त्र र मानव अधिकारसम्बन्धी अमेरिकी उपविदेश मन्त्री उज्रा जियाले प्रधानमन्त्री शेरबहादुर देउवालाई भेटेकी छन् । दुई दिन अघि नेपाल आएकी जियाले प्रधानमन्त्री निवास बालुवाटार पुगेर प्रधानमन्त्री देउवासँग भेटेकी हुन् । सो अवसरमा नेपाल र अमेरिकीबीचको सम्बन्ध तथा द्विपक्षीय हितको बारेमा छलफल भएको प्रधानमन्त्रीको सचिवालयले जानकारी दिएको छ । 

अमेरिकी सहयोग परियोजना (एमसीसी)सम्झौता अनुमोदनसँगै नेपाल–अमेरिका कूटनीतिक सम्बन्धको ७५औं वर्षगाँठ मनाइरहँदा जियाको नेपाल भ्रमण भएको हो । तिब्बत मामिलासम्बन्धि विशेष संयोजक समेत रहेकी जिया भारत भ्रमण सकेर नेपाल आएकी हुन्। भारतमा रहँदा उनले दलाई लामासँगसमेत भेट गरेकी थिइन्।