भारत भ्रमण सम्झौताको चाङ लगाउन होइ्न, भएका सम्झौताहरु कार्यान्वयनमा केन्द्रीत हुन्छ : प्रधानमन्त्री अोली

काठमाडौं । प्रधानमन्त्री केपी शर्मा ओलीले अाफुले गर्न लागेको भारत भ्रमणका बारे मंगलबार संसदलार्इ औपचारिक रुपमा जानकारी गराएका छन् ।

संसदमा सम्वोधन गर्दै अनले आफ्नो भारत भ्रमणलाई राष्ट्रहितमा केन्दि्रत गर्न प्रयास गर्ने बताएका छन् । ओलीले आफ्नो प्राथमिकता सम्झौताको चाङ लगाउने नभई भएका सम्झौताहरु कार्यान्वयन र आपसी सम्वन्धलाई फलदायी बनाउने हुने बताए । उनले भने, कृषिका साथै जलमार्ग र रेलमार्गबारे पनि कुराकानी गर्छु ।’

भारत भ्रमणबारे संसदलाई जानकारी गराउँदै प्रधानमन्त्री ओलीले विदेश नीतिको प्रस्थान विन्दु मित्रता भने । उनले , मितत्रा कसरी हुन्छ भने सम्वन्ध समानता र अहस्तक्षेपका आधारमा हुन्छ ।’ उनले छिमेकी मुलुकहरुसँग शंकारहित भरपर्दो मित्रताको वातावरण विकास  गर्न चाहेको बताएका छन् ।

मुलुकको समृद्धिका लागि छिमेकी भारत र चीनसँग सन्तुलित सम्बन्ध, भरपर्दाे, मैत्रीपूर्ण, समानता, पारस्परिक लाभ र विश्वासयुक्त वातावरणका आधार विकास गर्ने तथा छिमेकीलाई विकासका साझेदार बनाउने सरकारको अभीष्ट रहेको स्पष्ट पार्दै प्रधानमन्त्री ओलीले शंकारहित र भरपर्दाे मित्रता कायम गर्ने सरकारको नीति रहेको बताए । 

उनले भने, “छिमेकसँगको मित्रतापूर्ण सम्बन्ध, अहस्तक्षेपकारी नीति, संयुक्त राष्ट्रसंघको बडापत्र, नेपालको पञ्चशीलको आधार र राष्ट्रहित एवं न्यायपूर्ण सम्बन्ध हाम्रो छिमेक सम्बन्धको प्रस्थानबिन्दु हो । देशको शिर झुक्ने कुनै काम गरिनेछैन । शिर उठाउने काम मात्र गरिनेछ ।” 

भारतसँग पुरानो र घनिष्ट सम्बन्ध रहेको र कसैप्रति अर्घेल्याईं नगरी आफ्ना हितलाई राख्नुपर्ने उल्लेख गर्दै उनले दुई देशबीच सन् १९५० को सन्धिलगायत विषयमा पुनरवलोकन गर्न प्रबुद्ध व्यक्तिहरुको समूहले समीक्षा गरिरहेको बताए । अब दुई मुलुकबीचको सम्बन्ध नयाँ उचाइमा पुग्ने विश्वास पनि उनले व्यक्त गरे ।

आफ्नो आसन्न भ्रमणलाई देश र जनताको अधिकतम हितमा कसरी उपलब्धिपूर्ण बनाउन सकिन्छ र आपसी सम्बन्ध थप मजबुत कसरी बनाउन सकिन्छ भन्ने विषयमा आफ्नो प्रयास हुने पनि उनले बताए । 

प्रधानमन्त्री ओलीले आफ्नो अघिल्लो भारत भ्रमणमा धेरै सम्झौता नभई सम्बन्धलाई मजबुत बनाउनमा मात्रै केन्द्रित रहेको जनाउँदै भने, “दुई देशबीच आपसी सम्झौताभन्दा पनि भइसकेका सम्झौताको प्रभावकारी कार्यान्वयनमा ठोस प्रगतितर्फ मेरो ध्यान रहनेछ ।” 

प्रधानमन्त्री ओलीले नेपालको कृषिमा आधुनिकीकरण, ऊर्जा उत्पादन र व्यापार वृद्धि, अशोभनीय व्यापार घाटा न्यूनीकरण, लगानीको आकर्षण, निर्यात वृद्धि, पञ्चेश्वर बहुउद्देश्यीय परियोजनाको प्रभावकारी कार्यान्वयन, कनेक्टिभिटीमा विस्तार, एकीकृत चेकपोष्ट, पारस्परिक हित अभिवृद्धि, हुलाकी राजमार्ग जस्ता विषयमा दुवैतर्फबाट सहजीकरण गर्ने र भूकम्पपछि भारतले गरेको प्रतिबद्धता र जिम्मेवारीलाई तीव्रता दिन गम्भीर कुराकानी हुने बताए ।

उनले नेपालका लागि भारतबाट सहुलितपूर्ण ऋण, नेपालको थप हवाईमार्ग र पारवहन थप सहज बनाउन, सीमा क्षेत्रको पूर्वाधार निर्माण, नेपालीहरुलाई सटही सुविधामा परेको नोक्सानी, क्षिण एशियाली क्षेत्रीय सहयोग संगठन (सार्क) शिखर सम्मेलन र बिमस्टेकजस्ता अन्य क्षेत्रीय सम्मेलनलाई सञ्चालन गर्ने विषयमा भारतीय समकक्षीसँग कुरा हुने बताए । भारत र पाकिस्तानबीचको तनावका कारण सार्क शिखर सम्मेलन हुन सकेको छैन । 

उनले आतंकवाद र मानव तस्करी नियन्त्रणलगायत साझा र भारतीय पक्षको जायज चासोका विषयमा नेपालले ध्यान दिने उल्लेख गर्दै भारतमा हुने उच्चस्तरीय भेटवार्तामा यी विषयमाथि छलफल हुने स्पष्ट गरे । 

नयाँ संविधान अनुकूल सबै तहका निर्वाचन भइसकेको र देशले निर्दिष्ट गन्तव्यको सुस्पष्ट मार्ग लिइसकेको सन्दर्भमा नयाँ संकल्पका साथ समृद्धिको उचाइका लागि लाग्नुपर्नुमा उहाँले जोड दिए । उनले लोकतान्त्रिक आन्दोलन हुँदै विधिबाट निर्वाचित सुदृढ सरकारले आपराधिक र अराजकपूर्ण व्यवहारमा नियन्त्रण गरी मुलुकभित्रका सबै समस्याको शान्तिपूर्ण रुपमा समाधान गर्ने दृढता व्यक्त गरे । उनले भने, “त्यस्ता अपराध, तस्करी र अराजकपूर्ण व्यवहार सहँदैन, नियन्त्रण गर्न चाहन्छ, म जनतालाई आश्वस्त पार्न चाहन्छु ।” 

प्रधानमन्त्री ओलीले हाल जनता सार्वभौम भएको अवस्थामा सार्वभौमसत्ताको सही प्रयोग गर्न उपलब्धिको रक्षा गर्दै लोकतन्त्रको प्रभावकारी कार्यान्वयन तथा राष्ट्रिय हितको प्रभावकारी संरक्षण गर्दै सबैलाई समान रुपमा अधिकार र अवसर दिन कटिबद्ध रहेको बताए । सुदृढ सामाजिक सद्भावका साथ शान्ति, स्थिरतालाई मजबुत गर्दै सम्पूर्ण ध्यान विकासमा केन्द्रित गर्नुपर्ने र त्यसका लागि भ्रष्टाचारप्रति असहिष्णु हुँदै सुशासन दिन अत्यावश्यक भएको उनको भनाइ थियो । 

प्रधानमन्त्री ओलीले भारत भ्रमणका क्रममा त्यहाँका उद्योगी तथा व्यवसायीसँग छलफल, त्यहाँ रहेका नेपाली समुदायसँगको भेटघाट गर्नाका साथै उत्तराखण्डको कृषि तथा प्रविधि विश्वविद्यालयको अवलोकनसमेत गर्ने छन् । 

श्वेतपत्र यथार्थपत्र 

बैठकको विशेष समयमा केही सांसदहरुले अर्थमन्त्रालयको श्वेतपत्र अतिरञ्जनापूर्ण भएको टिप्पणी गरेकाप्रति जवाफ दिँदै प्रधानमन्त्री ओलीले श्वेतपत्र निराशापत्र नभई यथार्थपत्र भएको दाबी पनि गरे । उनले आगामी दिनमा स्रोत साधनको भरपूर उपयोग गरी अर्थतन्त्रलाई त्यस प्रकारको नाजुक अवस्थामा पु¥याउन नदिने विश्वास व्यक्त गरे । सरकारको लोकतन्त्र, समृद्धि र सुशासनको प्रतिबद्धता र व्यवहारमाथि खबरदारी गर्न विपक्षीलाई उनले आग्रह गरे । 

पीडितलाई छानमुनि ल्याउन प्राथमिकता 

भूकम्पपीडितका लागि दिनुपर्ने रकम वितरण र पुनःनिर्माणमा तीव्रता दिन राष्ट्रिय पुनःनिर्माण प्राधिकरणको परामर्श समिति र निर्देशक समितिको पछिल्लो बैठकलाई प्रभावकारी काम गर्ने निर्देशन दिइएको पनि उनले स्पष्ट पारे । 

“सबैभन्दा पहिला वृद्ध, अशक्त, बालबालिकालाई छानमुनि ल्याउनुस्, मन्दिरको पुनःनिर्माण एक वर्षपछि गरेर पनि त्यसको प्राण प्रतिष्ठा ल्याउन सकिन्छ तर मान्छेको ज्यान गएमा फर्काउन सकिन्न, पहिला जनतालाई प्राथमिकता दिन निर्देशन दिएको छु” – प्रधानमन्त्री ओलीले भने । 

उनले प्रदेश र स्थानीय तहमा कर्मचारी व्यवस्थापन, दिगो विकासका लक्ष्यलाई प्राथमिकता, राष्ट्रिय गौरवका आयोजना निर्माण, पूर्व–पश्चिम रेल निर्माण, ऊर्जा विकास र जनप्रतिनिधिसँगका समस्या सम्बोधन गर्न आवश्यक निर्णय गरिएकाले नयाँ संरचनालाई धान्न संगठनात्मक र भौतिक संरचना निर्माणमा पनि प्राथमिकता दिने बताए ।