राष्ट्रियसभाको निर्वाचनपछि मात्र सरकारको गठन प्रक्रिया शुरु हुन्छ : नेता खाँड

काठमाडौँ । नेपाली काँग्रेसका नेता बालकृष्ण खाँडले राष्ट्रियसभाको निर्वाचन सम्पन्न भएपछि मात्र नयाँ सरकारको गठन प्रक्रिया शुरु हुने बताएका छन् । 

रिपोर्टर्स क्लबमा आज आयोजित साक्षात्कारमा उनले राष्ट्रियसभाको निर्वाचन सम्पन्न भएपछि मात्र एउट सत्र पूरा हुन्छ र नयाँ सरकार निर्माणको प्रक्रिया प्रारम्भ हुन्छ भने । 

संघीय संसद्को निर्वाचनबाट १६५ सदस्य निर्वाचित भइसकेको भएपनि संघीय संसद्मा रहेका राजनीतिक दलले आफ्नो तर्फबाट एक तिहाइ महिला निर्वाचित गरेर पठाउने काम बाँकी रहेको र २७५ सदस्यीय सांसदले पूर्णता पाइसकेको अवस्था नरहेको खाँडले बताए । 

प्रदेश प्रमुखको नियुक्तिका लागि सरकारले गृहकार्य गरिरहेको र अस्थायी राजधानीको घोषणा प्रदेशसभाले नै गर्नु संविधानसम्मत हुने उनले धारणा राखे । 

नेता खाँडले नेपाली काँग्रेस अहिले सामूहिक नेतृत्वमा अघि बढिरहेको, बिपी र कृष्णप्रसाद भट्टराईको पालामा जस्तो अध्यक्षात्मक शैलीमा जाने भन्ने विषयमा नेपाली काँग्रेसभित्र गम्भीर बहस भइरहेको बताए । 

त्यस्तै महासमितिको बैठक तथा पार्टीभित्रको मतमतान्तरका बारेमा पनि नेता र कार्यकर्ताबीच छलफल चलिरहेको उनले उल्लेख गरे । 

अर्को प्रसंगमा डा गोविन्द केसीले उठाएको मुद्दा महत्वपूर्ण रहेको तर आफूहरुको सर्वोच्च अदालतको निर्णयप्रति पनि सम्मान रहेको खाँडले बताए ।