प्रधानमन्त्री देउवाले बोलाएको प्रमुख पाँच दलको बैठक बालुवाटारमा शुरु

काठमाडौं । प्रधानमन्त्री शेरबहादुर देउवाले बोलाएको प्रमुख पाँच दलको बैठक बालुवाटारमा अहिले शुरु भएको छ । 

प्रधानमन्त्री निवास बालुवाटारमा नेपाली काँग्रेस, नेकपा (एमाले), नेकपा (माओवादी केन्द्र), राष्ट्रिय जनता पार्टी र संघीय समाजवादी फोरमसहितको बैठक शुरु भएको हो । 

प्रमुख राजनीतिक दलका शीर्ष नेता सहभागी बैठकमा राष्ट्रपति कार्यालयमा रहेको राष्ट्रियसभा निर्वाचन अध्यादेश विषयलगायत अन्य राजनीतिक मुद्दामा छलफल हुने बुझिएको छ । 

बैठकमा एमाले अध्यक्ष केपी शर्मा ओली, माओवादी केन्द्रका अध्यक्ष प्रचण्ड, राजपा अध्यक्षमण्डलका संयोजक महन्थ ठाकुर र संघीय समाजवादी फोरम (नेपाल)का अध्यक्ष उपेन्द्र यादवलगायत अन्य नेताहरुको सहभागिता छ ।

पछिल्लो राजनीतिक गतिविधिका बारेमा छलफलका लागि प्रधानमन्त्रीको सरकारी निवास बालुवाटारमा प्रमुख दलको बैठक शुरु भएको प्रधानमन्त्रीका प्रेश संयोजकले जानकारी दिए। 

निर्वाचन सकिएसँगै सत्तापक्ष र बाम गठबन्धनवीच चुलिएको संवादहिनता तोड्दै प्रधानमन्त्री शेरबहादुर देउवाले आज सर्वदलीय बैठक बोलाएका छन्। राष्ट्रिय सभा गठन प्रकृयामा नेपाली कांग्रेस र बाम गठबन्धनवीच चर्किएको विवाद साम्य पार्ने उदेश्यले सर्बदलीय बैठक बस्न लागेको थाहा भएको छ ।

विवाद चुलिँदै गर्दा राष्ट्रपति विद्या भण्डारी र एमाले अध्यक्ष केपी शर्मा ओलीवीच भएको एक्लाएक्लै वार्तापछि प्रमुख दलहरुको वाक्युध्द चर्किएको थियो । त्यसपछि गठबन्धनका नेताहरु ओली र पुष्पकमल दाहालले फेरि राष्ट्रपतिलाई संयुक्त रुपमा भेटेपछि ओलीबाट आएको चर्को टिप्पणीले झनै तिक्तता बढाएको देखिएको थियो । 

यही तिक्तता तोड्दै संवाद सुरु गर्ने उदेश्यले प्रधानमन्त्री देउवाले बैठक डाकेको बताइएको छ।  बैठकमा प्रतिनिधि सभामा निर्वाचित दलका शीर्ष नेताहरुको सहभागिता रहने बताईएको छ।