तोकिएकै समयमा निर्वाचन हुन्छ : मन्त्री विश्वकर्मा

काठमाडौँ । वाणिज्यमन्त्री मीनबहादुर विश्वकर्माले सरकारले कुनैपनि हालतमा प्रदेश र प्रतिनिधि सभाको निर्वाचन गराइ छाड्ने बताए ।

रिपोर्टर्स क्लब नेपालले आयोजना गरेको कार्यक्रममा उनले मुलुक निर्वाचनतर्फ होम्मिएको चर्चा गर्दै तोकिएकै समयमा निर्वाचन हुनेमा जोड दिए ।

मन्त्री विश्वकर्माले स्थानीय तहको निर्वाचनमा काँग्रेससँग सहकार्य गरेर फाइदा लिएको माओवादी केन्द्रले प्रदेश र प्रतिनिधि सभाको निर्वाचनमा काँग्रेससँग सहकार्य गरेर फाइदा लिन गाह्रो देखेर एमालेसँग गठबन्धन गर्न लागेको आरोप लगाए ।

शहरी विकासमन्त्री दीलनाथ गिरीले निर्वाचनको सुनिश्चितताका लागि आफूहरु सरकारमा सहभागी भएको बताए । उनले मंसिरमा निर्वाचन हुनसक्दैन भनेर विपक्षी दलहरूले जनतामाझ अतिरञ्जित कुरा गरेको आरोप लगाए ।

बिना विभागीय मन्त्री महेन्द्रबहादुर शाहीले निर्वाचनको सुनिश्चितता नभएका कारण आफूहरु अझैसम्म सरकारमा बसिरहेको बताए । ‘निर्वाचनको लागि मनोनयन दर्ताको प्रक्रिया अगाडि बढ्ने वित्तिकै हामी सरकार छोड्छौँ,’ उनले भने ।

प्रधानमन्त्रीले तपाईँहरुले प्रतिपक्षी दलसँग सहकार्य गरे । मन्त्री पद छोड्नुहोस् भनेर आफूहरुलाई भने माओवादी केन्द्र सरकार छाड्न तयार रहेको उनको भनाइ थियो ।

राष्ट्रिय जनता पार्टीका नेता जीतेन्द्र सोनलले आगामी निर्वाचनमा संविधान संशोधनको मुद्दा बोकेका लोकतान्त्रिक दलसँग सहकार्य हुने बताए ।

उनले भने ‘राजपा र संघीय समाजवादी फोरम नेपाल निर्वाचनमा सहकार्य गरेर अगाडि बढ्ने कुरा भइरहेको छ, केही ठाँउमा काँग्रेस र अरु लोकतान्त्रिक दलसँग पनि सहकार्य गर्छौँ,।’