माधवकुमार नेपाल भन्छन्, ‘हाम्रो यो मोर्चा वेस्वादको, सिद्धान्तहिन र विचारहिन मोर्चा होइन’

काठमाडौं । नेकपा (एकीकृत समाजवादी) का अध्यक्ष माधवकुमार नेपालले समाजवादी मोर्चा स्वार्थमा नबनेको बताएका छन् । साथै केहीले भनेजस्तो कसैलाई तर्साउन वा कसैसँग मुकाबिला गर्न पनि नबनाएको उनको दाबी छ ।

सोमबार समाजवादी मोर्चा घोषणा कार्यक्रमा अध्यक्ष नेपालले प्रतिगमन र यथास्थितिविरुद्ध एकतावद्ध हुन मोर्चाबन्दी गरेको बताए । उनले अगाडि भने, ‘यो कसैलाई तर्साउन पनि होइन, कसैको मुकाबिला गर्न पनि होइन । ढुक्क हुनुस् ।’

एमाले अध्यक्ष केपी शर्मा ओलीले कांग्रेसलाई तर्साउन र एमालेको मुकाबिला गर्न मोर्चा बनाउन लागेको टिप्पणी गरेका थिए । तर नेता नेपालले त्यसको खण्डन गरे । उनले अगाडि भने, ‘कुनै पार्टीलाई घुर्क्याउन खोजेका होइनौं, कसैलाई दबाव दिन र कसैलाई तर्साउन चाहेको पनि होइन ।

तर प्रतिगमनको भने मुकाबिला गर्ने उनले बताए । नेपालले आफूहरुले बनाएको समाजवादी मोर्चाले कुनै पार्टीलाई घुर्क्याउन, दबाब दिन र तर्साउन नखोजेको बताए ।

आफ्नै पार्टीका नेताहरुलाई पनि मोर्चामा आवद्ध भएका दलहरु एकअर्कामा बिलय हुने त होइन भन्ने परेको भन्दै एकीकृत समाजवादी अध्यक्ष नेपालले भने, ‘कसैले निल्ने वाला छैन, हामी निलिने बाला पनि छैनौं ।’ आफूहरुको सम्बन्ध आजको नभएको र पहिलो सहकार्य पनि नभएको भन्दै उनले आपसमा विश्वास रहेको बताए ।

उनले समाजवादी मोर्चा निर्माण भएपछि आफ्नो पार्टीको विलय हुने कसैले गरेको तर्कको खण्डन गरे । ‘कसैले व्याख्या गरेका छन्, अब यो पार्टी अर्को पार्टीमा विलय त हुने होइनरु हाम्रो पार्टीमा पनि केहीलाई त्यस्तो परेछ। कसैले निल्नेवाला छैन, हामी निलिनेवाला पनि छैनौं,’ नेपालले भने । साथै, उनले आफूहरु समाजको परिवर्तनका लागि एकतावद्ध भएर अघि बढ्ने दाबी गरे ।

उनले समाजवादी मोर्चा कुनै स्वादको मोर्चा नभएको पनि बताए । ‘हाम्रो यो मोर्चा स्वादको मोर्चा होइन, सिद्धान्तहिन मोर्चा होइन, विचारहिन मोर्चा होइन,’ नेपालले भने, ‘प्रतिगमनका विरुद्धमा परिवर्तनका लागि एकतावद्ध हुने देशभक्त शक्तिहरुलाई एकतावद्ध बनाएर अघि बढाउनुपर्छ ।’

प्रतिगमन पक्ष र परिवर्तनको विपक्षमा उभिनेहरुको विरुद्धमा आफूहरुको मोर्चा हुने उनले बताए । ‘यसो हेर्दा सजिलै गरी नेताहरु बसेका होलान, सजिलै सहमति गरेका होलान् । त्यस्तो होइन । पापड बेल्नु पर्दो रहेछ। शब्द शब्दमा हामीले छलफल गरेका छौं,’ उनले भने, ‘विषयवस्तुमा हामीले गम्भीर बहस गरेका छौं ।’