राष्ट्रपति निर्वाचनमा राप्रपा तटस्थ बस्ने, यस्तो छ कारण

काठमाडौं । राष्ट्रिय प्रजातन्त्र पार्टीले राष्ट्रपति निर्वाचनमा मतदान नगर्ने निर्णय गरेको छ । राष्ट्रपति चयनका लागि बिहीबार हुने निर्वाचनमा कुनै पनि उम्मेदवारलाई भोट नहाल्ने निर्णयमा राप्रपा पुगेको हो ।

२०७४ सालको चुनावपछि पुनः विद्या भण्डारी नै राष्ट्रपतिको उम्मेदवार बन्दा प्रतिनिधिसभा सदस्य राजेन्द्र लिङ्देन, प्रदेशसभा सदस्यहरु रिता माझी, इन्दिरा राई र शोसिला शाहीले भण्डारीलाई नै मत दिएका थिए । यतिबेला थापा राप्रपामा छैनन्, लिङ्देन अध्यक्ष छन् । त्यतिबेला भण्डारीलाई मत दिनुको कारणबारे विज्ञप्ति नै निकालेको थियो ।

राप्रपाको बुधबार बसेको केन्द्रीय समितिको बैठकले राष्ट्रपति चुनावमा कुनै पनि उम्मेदवारलाई भोट नहाल्ने निर्णय गरेको प्रचार विभाग प्रमुखसमेत रहेका प्रवक्ता मोहन श्रेष्ठले जानकारी दिए ।

राष्ट्रपति निर्वाचन भोलि हुँदैछ । कांग्रेसका रामचन्द्र पौडेल र एमालेका सुवासचन्द्र नेम्वाङ उम्मेदवार छन् । राष्ट्रपति निर्वाचनमा संघीय सांसद र प्रदेशसभा सदस्यहरुले मतदान गर्नेछन् । राप्रपाका १४ जना संघीय सांसद र २८ जना प्रदेशसभा सदस्य छन् ।

अध्यक्ष लिङ्देनले राष्ट्रपति पदको उम्मेदवारी हालेका रामचन्द्र पौडेल र सुवास नेम्बाङ दुवै सक्रिय राजनीतिमा रहेकाले निष्पक्ष राज्य सञ्चालनको परिकल्पना गर्न नसकेको प्रष्टीकरण दिए ।

पार्टीका केही नेताहरुका अनुसार राष्ट्रपति चुनावमा भोट हाल्न हुँदैन भन्ने पक्षमा पहिलेदेखि नै रहेका रवीन्द्र मिश्र, ज्ञानेन्द्रबहादुर शाही लगायतका नेताहरु हाबी हुँदै गएका कारण लिङ्देन रक्षात्मक बन्न पुगेका हुन् ।

अध्यक्ष लिङ्देनले यसअघिका दुई राष्ट्रपतिको कार्यकाल दल निरपेक्ष हुन नसकेको तर्क दिएका छन् । ‘अहिलेका उम्मेदवारबाट पनि त्यही कुराको निरन्तता प्राप्त गर्ने र फेरि पनि यो संस्था निष्पक्ष बन्न नसक्ने सम्भावना छ’, उनले कार्यसम्पादन समितिको बैठकपछि पत्रकारहरुसँग भने, ‘त्यसैले हामी तटस्थ बस्ने निर्णयमा पुग्यौं ।’