एमाले सरकारबाट बाहिरिने तरखरमा, शनिबार सचिवालयको बैठक बस्दै

काठमाडौं । अप्रत्यासित रुपमा पुन १० गते सरकारमा प्रवेश पाएको नेकपा एमाले सरकारबाट बाहिरिने तयारी गरेको छ । बालुवाटारमा आठ दलले राष्ट्रपति कांग्रेसलाई दिने निर्णय गरेपछि एमाले सरकारबाट बाहिरिने तयारी गरेको हो ।

शीतल निवासमा भएको भेटघाटमा अध्यक्ष केपी शर्मा ओलीले भोलि शनिबार बस्ने पदाधिकारी बैठकले सरकारबाट बाहिरिने औपचारिक निर्णय गर्ने मनस्थितीमा पुगेको छ । एमालेले प्रधानमन्त्री प्रचण्डले धोका दिएको आरोप लगाएको छ । उसले शुक्रबार बालुवाटारमा ८ दलको बैठकले गरेको निर्णयले देशमा नयाँ अस्थिरताको बिजारोपण भएको आरोपसमेत लगाएको छ ।

एमालेले यसलाई राजनीतिक दाउपेच भित्रको ‘छक्कापञ्जा’ को संज्ञा दिँदै नयाँ सहमतिले थप राजनीतिक अस्थिरता निम्तने जिकिर गरिसकेको छ । एमालेका उपमहासचिव प्रदीप ज्ञवालीले पुरानो गठबन्धन ब्युँताएर राष्ट्रपतिमा कांग्रेसको उम्मेदवार चयन हुनु राजनीतिक दाउपेच भित्रको छक्कापञ्जा भएको प्रतिक्रिया दिए ।

उनले भने,‘ यो निर्णय नेपाल राज्यलाई थप अस्थिर बनाउने निर्णय हो। यो निर्णय गरेर कतिपय नेताहरुले आफ्ना निम्ति राजनीति भनेको खाली दाउपेच, छक्कापन्जा र स्वार्थको लेनदेनको प्रमाणित गर्नुभएको छ । हामीले भोली बिहान संस्थागत निर्णयका लागि केन्द्रीय सचिवालयको बैठक बसेर निर्णय गार्छौं ।’