प्रतिनिधिसभामा पहिलो खाता खोले मुस्ताङका २९ वर्षीय योगेश गौचनले, कांग्रेसको पहिलो जित

काठमाडौं । प्रतिनिधि सभामा एक मात्रै निर्वाचन क्षेत्र रहेको मुस्ताङबाट नेपाली कांग्रेसका युवा नेता योगेश गौचन थकाली निर्वाचित भएका छन् ।

२८ वर्षीय गौचनले नेकपा एमालेका प्रेमप्रकाश तुलाचनलाई पराजित गरेका हुन् । गौचनले तीन हजार १५६ मत पाउँदा एमालेका तुलाचनले दुई हजार ५२१ मत मात्रै पाएका छन् । राष्ट्रिय स्वतन्त्र पार्टीका प्रवीणकुमार शेरचनले ६६ मत मात्रै पाएका छन् ।

थकाली कांग्रेस गण्डकी प्रदेशको कार्यसम्पादन र कार्यसमिति सदस्य छन् । पार्टीको वडा सभापति र जिल्ला सदस्य हुँदै उनी मुस्ताङबाट कांग्रेसको महाधिवेशन प्रतिनिधि र महासमिति सदस्य छन् ।

२०५० वैशाख २७ गते जन्मिएका गौचन थासाङ गाउँपालिका लेते निवासी हुन् । उनले ब्याचलर अफ बिजनेस म्यानेजमेन्ट गरेका छन् । उनी व्यवसायी पनि हुन् । उनको होटल कालोपानी, लेते मुस्ताङ र पोखरामा त्रिथुङ्गा ट्राभल्स एण्ड टुर्स प्रालि एमडी, मुस्ताङमा किवी खेतीलगायत अर्गानक कृषि फार्म पनि छ ।