हिलोमा पाइन्ट माथि सुर्कदैं देउवाले भनेः पार्टीलाई नं १ बनाउँछु

भक्तपुर । नेपाली काँग्रेसका सभापति शेरबहादुर देउवाले अर्को चुनावसम्म पार्टीलाई नं एक बनाउने दाबी गरेका छन् ।

नेपाली काँग्रेस चाँगुनारायण नगर समितिले धान दिवसको अवसरमा आज बागेश्वरीमा आयोजना गरेको रोपाइँ कार्यक्रममा बोल्दै सभापति देउवाले सबैजना एक भएर अगाडि बढ्नुको विकल्प नभएको बताए ।

सबै मिलेर पार्टीलाई अगाडि बढाउनुपर्ने बताउँदै देउवाले भने –“आगामी दिनमा सबै एक भएर अगाडि बढे काँग्रेस पुनः देशको एक नम्बरको पार्टी बन्छ, सबैलाई आफ्ना कमी कमजोरीलाई सुधार्दै अगाडि बढ्न म आग्रह गर्दछु ।”

सांस्कृतिक परम्पराले नेपाली संस्कृतिलाई जीवन्त बनाएको भन्दै सभापति देउवाले धान दिवसले कृषि परम्परा र संस्कृतिको पहिचान स्थापित गरेको बताए ।

रोपाइँ कार्यक्रममा काँग्रेस केन्द्रीय सदस्य डिना संग्रौला, काँग्रेस भक्तपुरका सभापति दुर्लभ थापा, नगरसभापति यादव अधिकारीलगायत सहभागि थिए ।