निर्वाचनको तयारीमा निरन्तर जुट्न प्रधानमन्त्री ओली आग्रह

काठमाडौँ ।  निर्वाचन आयोग पुगेको प्रधानमन्त्री केपी शर्मा ओलीले निर्वाचनको तयारीको काम निरन्तर अगाडि बढाउन निर्देशन दिएका छन् । 

आज (मंगलबार) निर्वाचन आयोगको कार्यालय पुगेर प्रधानमन्त्री ओलीले  यस्तो आग्रह गरेको प्रधानमन्त्रीका प्रेस सल्लाहकार सूर्य थापाले जानकारी दिए ।

प्रधानमन्त्री ओली निर्वाचनको तयारीबारे जानकारी लिन आयोगको कार्यालय कान्तिपथ पुगेका थिए । प्रधानमन्त्रीसँगै उपप्रधानमन्त्री ईश्वर पोखरेल, नेकपा महासचिव विष्णु पौडेल र नेता सुवास नेम्वाङ पनि आयोगको कार्यालय पुगेका थिए ।

प्रमुख निर्वाचन आयुक्त थपलियाले निर्वाचनको लागि आवश्यक बजेट, बन्दोबस्तीका सामान लगायतका विभिन्न विषयमा जानकारी गराएको पनि थापाले जानकारी दिए । गत पुस ५ गते सरकारले संसद विघटन गरेलगत्तै नेकपा दुई  पक्षमा विभाजित भएपछि प्रधानमन्त्री ओली निर्वाचन आयोग  पहिलो पटक पुगेका हुन् । 

संसद विघटन गर्दै वैशाख १७ र २७ गते दुई चरणमा निर्वाचन गर्ने प्रधानमन्त्री ओलीको सिफारिसमा राष्ट्रपति विद्यादेवी भण्डारीले सदर गरेकी थिइन् ।