आज राजधानीमा नयाँ शक्तिको शक्ति प्रदर्शन, निर्मला पन्तको हत्यारालाई कारबाही माग

काठमाडौं । पूर्व प्रधानमन्त्री डा. बाबुराम भट्टराई नेतृत्वको नयाँ शक्ति पार्टीले आज आफ्नो शक्ति प्रदर्शन गर्दै छ ।

नयाँ शक्ति पार्टीको महिला संगठन महिला शक्ति महासंघले बालिका निर्मला पन्तको बलात्कार र हत्यामा संलग्नको शीघ्र पहिचान गरी कानूनी कारवाहीको लागि दवाव दिन आज प्रदर्शन गर्न लागेको हो ।

 बालिका निर्मलाको बलात्कारपछि हत्या भएको एक सय दिन पुगिसक्दा पनि अपराधी पत्ता लगाउन सरकारले केही काम नगरेकोले दवावका लागि प्रदर्शन गर्न लागिएको नयाँ शक्ति पार्टीकी हेडक्वार्टर सदस्य हिसिला यमीले जानकारी दिइन् ।

उनले निर्मला पन्तको बलात्कार र हत्यामा संलग्न वास्तविक अपराधीहरुको पहिचान र कारवाही नभएसम्म नयाँ शक्तिले दवाव आन्दोलनलाई जारी राख्ने पनि बताइन् ।
आज दिउँसो ३ बजे माइतीघर मण्डलमा महिला शक्ति महासंघले प्रदर्शन गर्न लागेको हो ।