महत्वपुर्ण विधेयक पारित नै नगरी संसद्को अधिवेशन सकिँदै

काठमाडौ‌ । संघीय संसद्मा करिब आधा दर्जन विधेयक पारित गर्न बाँकी नै छ तर संसदको दोश्रो अधिवेशन आज सकिँदै छ ।

संसदीय दलका नेताहरुको समन्वयमा प्रतिनिधिसभा र राष्ट्रियसभा दोस्रो अधिवेशन बिहीबारबाट सक्ने तयारी गरिएको संसद सचिवालयले जानकारी दिएको छ । संघीय संसद्को अधिवेशन गएको २३ वैशाखदेखि सुरु भएको थियो।

सचिवालयका अनुसार दशैं, तिहार जस्ता चाडपर्वको बेला सांसद्हरु आफ्नो निर्वाचन क्षेत्रमा जाने भएकाले अधिवेशन अन्त्य गर्न लागिएको हो ।

संघीय संसद्को पहिलो अधिवेशन फागुन २१ गते शुरु भएर चैत २० गते सकिएको थियो । राष्ट्रियसभा र प्रतिनिधिसभा बैठक शुरु र अन्त्य राष्ट्रपतिले गर्ने संवैधानिक व्यवस्था छ । दिउँसो राष्ट्रपति विद्यादेवी भण्डारीले अधिवेशन अन्त्य गर्ने कार्यक्रम छ ।

दोश्रो अधिवेशनले आर्थिक वर्ष ०७५ र ०७६ को बजेट पारित, मौलिक हक सम्बन्धी कानुन निर्माण र विभिन्न राष्ट्रिय महत्वका विषयमा सरकारलाई निर्देशन दिएको छ । तर अझै पनि धेरै महत्वपूर्ण विधेयक पारित गर्न बाँकी छ ।

नागरिकता संशोधन, चिकित्सा शिक्षा विधेयक, लेखा परीक्षण, भुक्तानी तथा फस्र्योट र विमा सम्बन्धी विधेयक पारित नगरी अधिवेशन अन्त्य हुन लागेको हो ।