कांग्रेसका प्रवक्ता भन्छन्, कम्युनिष्ट सरकारले दम्भको श्रीपेच फुकाल्नुपर्छ

काठमाडौं । प्रमुख प्रतिपक्ष दल नेपाली कांग्रेसले मंगलबार देशभर सरकारविरुद्ध प्रदर्शन गरेको छ ।

सरकारविरुद्ध लागेको नेपाली कांग्रेसले देशभर प्रदर्शन गर्दा सरकारविरुद्ध निक्कै चर्का नारावाजी समेत गरेको थियो । सो क्रममा सहभागीहरुले ‘आर्यघाटले के भन्छ, केपी ओलीलाई ले भन्छ’ जस्ता नारा पनि लगाएका थिए ।

काठमाडौंको शान्ति बाटिकाबाट सुरु भएको ¥यालीसहितको विरोध प्रदर्शन असन, इन्द्रचोक, न्यूरोड, न्यूरोड गेट हुँदै पुनः शान्ति वाटिकामा आएर कोणसभामा परिणत भएको थियो ।

नेपाली कांग्रेसले धनकुटा, भोजपुर, कपिलबस्तु, सुनसरी, धादिङ, बाजुरा, लगायतका सबै जिल्लामा विरोध प्रदर्शन गरेको छ । प्रदशृनका क्रममा उनीहरुले सरकार विरोधी नाराबाजी पनि गरेका छन् ।

झापा पुगेका नेपाली कांग्रेसका प्रवक्ता विश्वप्रकाश शर्माले कम्युनिष्ट सरकारलाई दम्भको श्रीपेच फुकाल्न आग्रह गरे । उनले बहुमतको सरकार बनेका बेला दम्भ हटाई जिम्मेवार भएर अघि बढ्न प्रधानमन्त्री केपी शर्मा ओलीलाई सुझाव दिए ।

झापाको चन्द्रगढीमा आयोजित सरकारविरुद्धको विरोधसभालाई सम्बोधन गर्दै प्रवक्ता शर्माले कांग्रेसलाई बल प्रयोग गरेर नियन्त्रण गर्न नसकिने बताए । ‘विवेकको बाटो लाग्नुभएन भने दम्भको श्रीपेच राखिरहनुभयो भने तपाईँले निषेधाज्ञा लगाएर ठाउँठाउँको जुलुस त रोक्न सक्नुहोला’ उनले भने, ‘तर तपाईँलाई नै भोट दिएर हृदयमा केपी ओलीको तस्बिर राखेर जो जनता बसेका छन्, तीनले आफ्नो हृदयबाट तपाईँको तस्बिर फुकाल्नका लागि कुनै निषेधाज्ञाले छेक्ने छैन ।’