फागुनमा संघर्ष, साउनमै घोषणा !

काठमाडौं । ‘काहीँ नभएको जात्रा हाडीगाउँमा’ भनिएजस्तै राष्ट्रिय प्रजातन्त्र पार्टीले नि पनि त्यस्तै जात्रा देखाएको छ । त्यो पनि हिन्दु राज्य स्थापनाको संघर्षका कार्यक्रममार्फत ।

राप्रपाले झण्डै आगामी फागुन ७ देखि हिन्दु राज्य स्थापनाको लागि निर्णयक संघर्ष गर्दैछ । तर, त्यसको ७ महिनाअघि नै आन्दोलनको घोषणा गरेको छ ।

‘देशभरी जागरण अभियान सञ्चालन गर्ने र उपयुक्त संगठनात्मक आधार तयार भएपछि २०७५ साल फागुन ७ गतेदेखि हिन्दू राष्ट्र पुनस्र्थापना निर्णायक र अविछिन्न जनसंघर्ष गर्नेछौं’ राप्रपा अध्यक्ष कमल थापाले भने, ‘फागुन ७ मा गरिने आन्दोलनले हिन्दु राज्य पुनःस्थापना गरेरै छाड्ने छ ।’

राप्रपाले काठमाडौंमा आयोजना गरेको हिन्दू राष्ट्र पुनस्र्थापना जनजागरण अभियानको उदघाटनमा अध्यक्ष थापाले देशब्यापी जागरण अभियान सञ्चालन गर्ने र फागुन ७ देखि निर्णायक आन्दोलन गर्ने घोषणा गरे ।

‘आवश्यक परे पार्टीको नाम र झण्डा प्रयोग नगरी आन्दोलन चलाउन तयार छौं’ उनले भने ‘आफूहरुको आन्दोलनअघि नै संविधान संशोधनमार्फत धर्म निरपेक्ष हटाउनेमा म ढुंक्क छु ।’

अध्यक्ष थापाले जनताको चाहना नहुँदानहुँदै स्वार्थी राजनीतिको कारण विदेशीको इशारामा हिन्दू राज्य हटाएको दावी गरे । उनले संविधानमा लेखिए पनि यसलाई राजनीतिमार्फत नै सुधार गर्नुपर्ने बताए । ‘राजनीतिले गरेको फोहर राजनीतिले नै सफा गर्नुपर्छ’ उनले भने ‘संविधानमा लेख्दैमा केही हुँदैन, यसलाई जनताले स्वीकारेका छैनन् ।’