गठबन्धनको बैठक : स्थानीय तहको रिपोर्ट पठाउने म्याद वैशाख ४ सम्म थप

काठमाडौं । सत्तारुढ गठबन्धनले स्थानीय तहको निर्वाचनका लागि तालमेलको खाका टुंग्याउन ४ वैशाखसम्मको समयसीमा तोकेको छ ।

गठबन्धनका शीर्ष नेताको मंगलबार बसेको बैठकले स्थानीय तहमा हुने तालमेल टुंग्याउन जिल्ला समितिलाई ४ वैशाखसम्मको समय दिएको हो । यसअघि चैत मशान्तभित्र तालमेल टुंग्याउन समय दिइएको थियो ।

बैठकले चुनावी तालमेलको मोडालिटी बनाउने भनिए पनि मातहत संयन्त्रबाट प्रतिवेदन प्राप्त नभएकाले निर्णयमा पुग्न नसिएको सिटौलाको भनाइ छ । स्थानीय तहको वस्तुस्थिति पठाउन यसअघि २ पटक समय थप गरिएको थियो ।

प्रधानमन्त्री निवास बालुवाटारमा जारी बैठकले वैशाख ४ भित्र उम्मेदवार टुंगो लगाउन निर्देशन दिने समझदारी भएको कांग्रेस नेता कृष्णप्रसाद सिटौलाले जानकारी दिए । सत्ता गठबन्धनको बैठकबाट बाहिरिने क्रममा नेता सिटौलाले भने ‘गठबन्धनका दलबीचमा वैशाख ४ गतेभित्र उम्मेदवार टुंगो लगाउन स्थानीय तहका कार्यसमितिलाई निर्देशन दिने कुरा भएको छ ।’