काठमाडौँ उपत्यकामा बुधबार १ हजार ४०३ जनामा कोरोना संक्रमण पुष्टि

काठमाडौँ । नेपालमा कोरोना भाइरस संक्रमितको संख्या बढ्दो क्रममा छ । काठमाडौँ उपत्यकामा बुधबार थप १ हजार ४०३ जनामा कोरोना भाइरसको संक्रमण पुष्टि भएको छ।

स्वास्थ्य मन्त्रालयका अनुसार काठमाडौँका ९९६, ललितपुरका ३०५ तथा भक्तपुरका १०२ जनामा संक्रमण पुष्टि भएको हो । बुधबार देशभर २ हजार ६३८ जनामा कोरोना संक्रमण पुष्टि भएको छ ।

पछिल्लो २४ घन्टामा २ हजार ६ सय ३८ जनामा कोरोना संक्रमण भएको स्वास्थ्य तथा जनसंख्या मन्त्रालयले जनाएको छ । नियमित पत्रकार सम्मेलनमा प्रवक्ता डा.जागेश्वर गौतमले विभिन्न जिल्लामा २४ घन्टामा थपिएका २ हजार ६ सय ३८ जनासहित देशभर संक्रमितको संख्या १ लाख १७ हजार ९ सय ९६ पुगेको जानकारी दिए ।

संक्रमितमध्ये ८० हजार ९ सय ५४ जना निको भएर घर फर्किएका छन् भने कोरोना संक्रमणबाट ६ सय ७५ जनाको ज्यान गएको छ ।