कोरोनाविरुद्ध रुसले बनाएको खोपले काम गर्ने अमेरिकाको विश्वासः ट्रम्प

वासिङटन । कोरोनाविरुद्ध रुसले बनाएको खोपले काम गर्ने विश्वास अमेरिकाले व्यक्त गरेको छ । अमेरिकी राष्ट्रपति डोनाल्ड ट्रम्पले रुसी खोप प्रभावकारी र उपयोगी हुने विश्वास शुक्रबार व्यक्त गरेका हुन् ।

‘मलाई रुसले बनाएको भनिएको खोपबारे धेरै थाहा छैन । तर, त्यो प्रभावकारी, उपयोगी हुन्छ र त्यसले काम गर्छ भन्ने मलाई विश्वास छ’, उनले भने ।

अमेरिकी राष्ट्रपतिको कार्यालय ह्वाइट हाउसमा भएको पत्रकार सम्मेलनमा उनले रुसी खोपबारे सकारात्मक प्रतिक्रिया जनाएका हुन् । कोरोना भाइरसविरुद्धको खोप तयार पार्न रुस विश्वको पहिलो राष्ट्र हुने पनि उनको भनाइ थियो ।

‘मलाई जानकारी भएसम्म कोरोना भाइरसविरुद्धको खोप तयार पार्नेमा रुस विश्वकै पहिलो मुलुक भएको छ । यो दर्ता भइसकेको पनि मैले थाहा पाएको छु’, उनले भने । उनले चाँडै ठूलो मात्रामा सो खोपको उत्पादन र प्रयोग हुन थाल्ने विश्वास पनि व्यक्त गरे ।

आधारभूत प्रक्रिया पूरा गर्ने र परीक्षण सबै सफल भएपछि आधिकारिक निकायले त्यसको प्रयोगका लागि स्वीकृति दिने उनको भनाइ थियो । उनले अमेरिकामा पनि केही वैज्ञानिकले तीनवटा खोप परीक्षण गरिरहेको र त्यो अहिले तेस्रो चरणमा पुगेको जानकारी दिए ।