प्रहरी मुख्यालयमा ४ जनामा कोरोना संक्रमण, १७ जनालाई आइसोलेसनमा राखियो

काठमाडौं । प्रहरी प्रधान कार्यालयमा कार्यरत चार जना अधिकारीमा कोरोना भाइरसको संक्रमण पुष्टि भएको छ । प्रहरी प्रधान कार्यालय, नक्सालस्थित सवारी शाखामा कार्यरत प्रहरीलाई संक्रमण देखिएको हो ।

हवल्दारमा कोरोना पुष्टि भएपछि उनी बस्ने ब्यारेकका १६–१७ जना प्रहरीको पीसीआर परीक्षणका लागि स्वाब नमुना लिएर आइसोलेसनमा राखिएको छ ।

प्रहरी मुख्यालयले यसबारे आधिकारिक सूचना सार्वजनिक गरिसकेको छैन । मुख्यालयमा कार्यरत चार जनालाई संक्रमण भएपछि थप अन्य केहीमा पनि संक्रमणको आशंका गरिएको छ ।

मुख्यालयभित्रै रहेको सञ्चार निर्देशनालयमा कार्यरत तीन जनालाई पनि संक्रमणको आशंका गरिएको छ । उनीहरुमा ज्वरोसहितका लक्षण देखिएपछि पीसीआर परीक्षण गरिएको थियो । प्रयोगशालाबाट पीसीआर रिपोर्ट आए पनि ३ जनाको नतिजा प्रहरीले सार्वजनिक गरेको छैन ।

उनीहरु तीन जनामध्ये एक प्रहरी मेसमा सहयोगीका रुपमा काम गर्छन् भने २ प्रहरी मेसका लागि आवश्यक सामग्री ल्याउने काम गर्छन् । उनीहरुलाई कोरोना संक्रमण भएपछि मुख्यालयमा सतर्कता अपनाइएको छ ।