युवतीलाई होटलमा लगेर मदिरा सेवन गराई बलात्कार गर्न खड्का पक्राउ

अर्घाखाँची । युवतीलाई होटलको व्यवस्था मिलाइ दिने र भाडासमेत तिरिदिने भन्दै होटलमा लगेर मदिरा सेवन गर्न लगाई बलात्कार गर्नलाई प्रहरीले पक्राउ गरेको छ ।

ती युवतीलाई जबर्जस्ती करणी अभियोगमा सन्धिखर्क नगरपालिका–१२ डिभर्नाका प्रेमबहादुर खड्कालाई पक्राउ गरिएको जिल्ला प्रहरी कार्यालयले जनाएको छ ।

उनलाई सन्धिखर्क शान्ति बगैँचास्थित होटल क्याराभानबाट प्रक्राउ गरेको हो । कपिलवस्तु बुद्धभूमि नगरपालिकाबाट कामको सिलसिलामा सन्धिखर्क आएकी एक महिलालाई जबर्जस्ती करणी गरेको अभियोगमा पक्राउ गरिएको प्रहरीले जनाएको छ ।

उनले होटलको व्यवस्था मिलाइ दिने तथा होटलको भाडासमेत तिरिदिने भनी आश्वासन देखाई होटलमा लगी करणी गरेको प्रहरीले जनाएको छ ।

खड्काले युवतीलाई मदिरा सेवन गर्न लगाई जबर्जस्ती करणी गरेको अनुसन्धानबाट खुल्न आएको जिल्ला प्रहरी कार्यालयका प्रमुख प्रहरी नायब उपरीक्षक नवराज मल्लले बताए । उनलाई जिल्ला अदालतबाट सात दिनको म्याद थप गरेर अनुसन्धान भइरहेको बताइएको छ ।