पाँच वर्षपछि आईएस नेता अल बग्दादी बोलेको भिडियो सार्वजनिक, श्रीलङ्का आक्रमणको जिम्मा

काठमाडौँ । पाँच वर्षपछि पहिलो पटक इस्लामिक स्टेट आईएस विद्रोही समुहका नाइके अबु बकर अल बग्दादीले बोलेको भिडियो सार्वजनिक गरेको छ । भिडियो सार्वजनिक भएपछि अमेरिकाले सो समूहलाई निमिट्यान्न पारिदिने बताएको छ ।

अमेरिकी अधिकारीहरूले सो भिडियो सन्देशको सत्यताबारे जाँच भइरहेको बताएका छन् । सिरिया र इराकमा उक्त समूहले आफ्नो नियन्त्रणमा रहेको भूभाग गुमाए पनि आईएस विरुद्धको लडाइँ नसिद्धिएको प्रस्ट भएको अमेरिकी विदेश मन्त्रालयले बताएको छ ।

अल बग्दादी सन् २०१४ देखि सार्वजनिक रूपमा देखा परेका थिएनन् र उनी मारिएको हुन सक्ने अनुमान गरिएको थियो । सो भिडिओमा अल बग्दादी भनि चिनाइएको व्यक्तिले सिरियामा मारिएकाहरूको बदलास्वरूप आफूहरूले आठ देशमा दर्जनौँ आक्रमण गरेको बताएका छन् ।

श्रीलङ्कामा भएको शृङ्खलाबद्ध विस्फोटनको जिम्मा लिँदै ती व्यक्तिले अझ लामो सङ्घर्ष जारी रहेको बताए । यस अघि सन् २०१४ मा इराकी सहर मोसुलमा क्यालिफेट घोषणा गर्ने क्रममा बग्दादी देखिएका थिए । यसअघि रुस र इराकले हवाई आक्रमणमा अल बग्दादी सम्भवतःमारिइसकेको भनेका थिए ।

अमेरिकाले चाहिँ सन् २०१७ मा भएको एक आक्रमणमा उनी गम्भीर घाइते भएको र उनलाई महिनौँसम्म युद्धभूमिबाट पर लगिएको बताएको थियो । तर भिडियोमा स्वस्थजस्तो देखिने बगदादीलाई देखेपछि त्यसले आईएसका समर्थकहरूलाई प्रोत्साहन मिल्न सक्ने बताइएको छ ।

अबु बकर अल(बग्दादीको जन्म सन् १९७१ मा इराकको समारामा भएको हो । अबु बकर अल बग्दादी बाल्यकालको रुचि कुरान वाचन र धार्मिक विधानमा भएको बताइन्छ । इस्लामिक परम्पराको विधिवत् पालना नगरेको भन्दै उनले आफ्नै परिवारका सदस्यहरूको पनि आलोचना गर्ने गरेका थिए ।

पछि सद्दाम युनिभर्सिटीमा कुरानसम्बन्धी विषयमा स्नातकोत्तर तथा विद्यावारिधि गर्दै गर्दा उनी कट्टरपन्थी इस्लामिक समूहहरूमा संलग्न भए । सन् २००० को अन्त्यतिर आइपुग्दा उनले सलाफी जिहाद अङ्गीकार गरिसकेका थिए ।

उनी इराकमा अल काइदामा पनि संलग्न भए। सो समूहबाट इस्लामिक स्टेट लडाकु समूहको उदय भयो। उनी सन् २०१४ देखि सार्वजनिक रूपमा देखा परेका थिएनन्।

‍