ब्रेक्जिटको समयसीमा बढाउने पक्षमा बहुमत, प्रधानमन्त्री मे दबाबमा

काठमाडौं । बेलायती संसदको तल्लो सदन हाउस अफ कमन्समा ब्रेक्जिटको समयसीमा बढाउने पक्षमा बहुमत सांसदले मतदान गरेका छन् ।

ब्रेक्जिटलाई लिएर बेलायतको संसदमा गतिरोधलाई हटाउने प्रयास जारी रहेका बखत केवल १ मतको बहुमतले समयसीमा बढाउने प्रस्तावले बहुमत हाँसिल गरेको हो ।

संसदको यो बहुमतले बेलायती प्रधानमन्त्री टेरिजा मेलाई युरोपेली संघसँग ब्रेक्जिट प्रक्रियाको समयसीमा बढाउनका लागि समय माग्न बाध्य तुल्याउने छ ।

ताकि बेलायतलाई विना सम्झौता युरोपेली संघबाट बाहिरिन नपरोस । प्रधानमन्त्री मेले जारी गतिरोध अन्त्य गर्न प्रतिपक्षी दलसँगको संवादलाई पनि अघि बढाएकी छन् । 

प्रधानमन्त्री कार्यालयले प्रतिपक्षी दल  लेवर पार्टीका नेता जेरेमी कार्विनसँगको छलफललाई सकारात्मक भनेको छ ।

उता प्रतिपक्षी दलका नेता कार्विनले भने आफुले आशा गरेअनुरुप प्रधानमन्त्रीलाई नपाएको बताएका छन् । 

ब्रेक्जिट प्रक्रियाको समयसीमा बढाउन लेवर पार्टीको तर्फबाट पेश गरिएको यो विधेयकलाई संसदले एकै दिनमा पारित गरेको हो ।

तर कानुन बन्नको लागि माथिल्लो सदन हाउस अफ लर्डसबाट यो विधेयक पारित हुन जरुरी छ ।

ब्रेक्जिटको समयसीमा बढाउने बेलायती प्रस्ताव स्वीकार गर्ने या अस्वीकार गर्ने भन्ने विषय भने युरोपेली संघमै निर्भर रहेको छ । विपक्षी दलसँग गरेको छलफलप्रति सत्तारुढ दलका केही सांसदहरुले भने आपत्ति जनाएका छन् ।(एजेन्सी)