लाइसेन्स बेच्ने यातायातका १० कर्मचारी अख्तियारको फन्दामा

काठमाडौ‌ । आर्थिक लेनदेनका आधारमा ट्रायल नै नदिई सवारीचालक अनुमतिपत्र (लाइसेन्स) बेच्ने १० कर्मचारीविरुद्ध अख्तियार दुरुपयोग अनुसन्धान आयोगले मुद्दा दर्ता गरेको छ ।

यातायात व्यवस्था कार्यालय बागमतीका तत्कालीन प्रमुख तेजनारायण यादवसहितका १० कर्मचारीविरुद्ध मंगलबार विशेष अदालतमा भ्रष्टाचार मुद्दा दायर भएको हो ।

आयोगका प्रवक्ता रामेश्वर दंगालका अनुसार उपसचिव यादवसहित मेकानिकल इन्जिनियर श्याम केसी, शाखा अधिकृतहरू ईश्वरराज रेग्मी, भूपराज दाहाल, शिवप्रसाद सुवेदी र विष्णुप्रसाद सुवेदीलाई प्रतिवादी बनाएको हो ।

यस्तै, ठूलोभर्‍याङस्थित यातायात व्यवस्था कार्यालयको सवारीचालक अनुमतिपत्र शाखा अधिकृत शालिग्राम पौडेल, यातायात व्यवस्था विभागका कम्प्युटर अपरेटर लक्ष्मण तिवारीलाई पनि प्रतिवादी बनाएको छ ।

ठूलोभर्‍याङस्थित कार्यालयका कम्प्युटर अपरेटर विज्ञान खड्की र एकान्तकुना ललितपुर कार्यालयका नायव सुब्बा लेखनाथ भुसालविरुद्ध समेत मुद्दा दायर भएको छ । मेकानिकल इन्जिनियर केसीविरुद्ध तीन महिनाअघि पनि अर्को मुद्दा दायर भएको थियो ।

‘उनीहरू यातायातका क्रोनिक कर्मचारीको समूह रहेछ,’ अनुसन्धानमा आबद्ध आयोगका एक अधिकारीले भने, ‘संगठित रूपमै उनीहरूले लामो समयदेखि यातायात कार्यालयमा सेटिङ जमाउँदै आएका थिए ।’