१६ वर्षीया बालिका बलात्कृत, बलात्कारी पक्राउ

स्याङ्जा । एक सुस्त मनःस्थिति भएकी १६ वर्षीया किशोरी बलात्कृत भएकी छिन् । बालिकालाई करणी गरेको आरोपमा ४८ वर्षे जुद्धबहादुर भण्डारी पक्राउ परेका छन् ।

पुतलीबजार नगरपालिका–१४ निवासी बालिकालाई बाख्रा चराएर घर फर्कने क्रममा उनले करणी गरेको प्रहरीले जनाएको छ । ती बालिका गत शुक्रबार आफ्ना बाबुसँग जंगलमा वस्तु चराउन गएकी र करिव २ बजेतिर बाबु बाख्रा लिएर घर फर्केपछि बालिका एक्लै गोरु चराईरहेको बेला भण्डारीले पैसाको लोभ देखाएर करणी गरेको प्रहरीले जनाएको छ ।

भण्डारीले चाउचाउ खाउ भनेर ३ वटा २० रुपैयाँको नोट दिएर फकाउने प्रयास गरेको देखिएको प्रहरी नायब उपरीक्षक प्रकाश विष्टले बताए ।

घर फर्केपछि नुहाउने क्रममा पीडित बालिकाले यौनांगमा पीडा भएको बताएपछि आमाबुबाले सोधखोज गर्ने क्रममा घटनाबारे थाहा पाएपछि प्रहरीलाई खबर गरिएको हो।

अभिभावकको किटानी जाहेरी बमोजिम आरोपितलाई करणी मुद्दामा ३ दिनको म्याद थप गरी हिरासतमा राखेर अनुसन्धान भइरहेको छ।