अमेरिकामा नेपथ्य ब्याण्ड

काठमाडौं । स्थापनाको रजत वर्ष मनाइरहेको नेपथ्य ब्याण्डले अमेरिकाका दुई सहरमा प्रस्तुती दिने तयारी गरेको छ । दक्षिणवर्ती अमेरिकी राज्य टेक्सासको डालास सहर तथा उत्तरपूर्वी कुना बोस्टनमा नेपथ्य घन्कन लागेको हो । अमेरिकाका यी दुवै महत्वपूर्ण सहरमा नेपथ्य पहिलोपटक प्रस्तुत हुन लागेको हो ।

यात्राको पहिलो प्रस्तुती जुन ९ तारिखका दिन डालासस्थित ‘द बम फ्याक्ट्री’ कन्सर्ट हलमा हुनेछ।
गैरआवासीय नेपालीहरुको संगठन ‘एनआरएन’का अनुसार अमेरिकामै उल्लेख्य संख्यामा नेपालीहरुको बसोबास रहेका सहरको रुपमा डालास र बोस्टन चिनिन्छन् ।

नेपथ्यले सामुहिक रुपमा पहिलोपटक सन् २००४ मा अमेरिकाको यात्रा गरेको थियो । त्यतिबेला ब्याण्डले एरिजोनाको फिनिक्स र राजधानी सहर वासिंगटन डिसीमा कन्सर्ट गरेको थियो । त्यसपछि पनि तीनपटक अमेरिकाको यात्रा गरिसकेको यस ब्याण्डले हालसम्म लस एन्जलस, एटलान्टा, न्यूयोर्क र सानफ्रान्सिस्कोका मञ्चहरुमा आफूलाई उभ्याइसकेको छ । ब्याण्डको यो पाँचौ अमेरिका यात्रा हो ।

ब्याण्डका मुख्य गायक तथा अगुवा अमृत गुरुङ अमेरिकामा प्रस्तुती दिन पाउँदा खुशी लागेको बताउँछन् । उनी भन्छन्, ‘बोस्टन र डालासका नेपाली दाजुभाइ दिदीबहिनीहरुका अगाडि नेपालीपनको नेपथ्य प्रस्तुत गर्ने क्षण हामी उत्साहका साथ प्रतिक्षा गरिरहेका छौं ।’