सहिद भीमनारायण गोल्डकप : सेमिफाइनलबाटै बाहिरियो साविकको विजेता युनाइटेड झापा

धनकुटा । साविकको विजेता युनाइटेड युथ क्लव झापा धनकुटामा जारी १७ औं संस्करणको सहिद भीमनारायण गोल्डकपबाट सेमिफाइनलबाटै बाहिरिएको छ ।

धनकुटाको तल्लो टुढिखेलमा भएको सनसनीपूर्ण खेलमा सप्तरीको नमोबुद्ध फुटवल क्लवले ३–१ गोलअन्तरमा सहज जित हात पार्दै फाइनल यात्रा तय गर्दा साविक विजेता युनाइटेड झापा स्तम्भ बनेको छ ।

नमोबुद्धका लागि पहिलो हाफको १४ औं मिनेटमा विवेक राईले गोलको खाता खोल्दा नमोबुद्धकै टिम क्याप्टेन सिर्जनराज गौतमले पहिलो हाफको २० औं र अन्तिम अवधि ९० औं मिनेटमा गरेको व्यक्तिगत गोल नै टिमका जितको लागि निर्णायक बन्यो ।

बिर्तामोडका टिम क्याप्टेन गिल्सन कन्दङ्वाले पहिलो हाफको २६ औं मिनेटमा १ गोल फर्काए पनि साविक विजेता टिमका लागि सान्त्वना गोल मात्र बन्यो । सहिद भीमनारायण गोल्डकपको १६ औं संस्करणको झापा सेमिफाइनलमा पराजित भएसँगै खेलबाटै बाहिरिएको छ ।

निकै प्रतिस्पर्धात्मक खेलमा दुवै टिमले आधा दर्जन बढी उत्कृष्ट गोल गर्ने मौका गुमाएका थिए । पहिलो हाफमा दुवै टिम सन्तुलित रहे पनि मध्यान्तर पछिको खेल भने अधिकांश समय नमोबुद्धले आफ्नो पक्षमा बल कब्जा जमायो ।

यसअघि नमोबुद्धले आयोजक सहिद भीमनारायण स्मृति टिम धनकुटालाई पराजित गर्दै सेमिफाइनल प्रवेश गरेको थियो भने बिर्तामोडले चित्लाङ फुटबल क्लब काठमाडौंलाई हराउँदै सेमिफाइनलमा पुगेको थियो । भोली विभागीय टिम एपीएफ क्लब र गाईघाट फुटबल क्लबबीच सेमिफाइनल हुनेछ ।

प्रतियोगिताका विजेताले नगद ५ लाख र उपविजेताले २ लाख ५० हजार रुपैयाँसहित ट्रफी मेडल, कप, प्रमाणपत्र हात पार्नेछन् । यस्तै सबैभन्दा बढी गोल गर्ने, म्यान अफ द म्याच तथा सर्वोत्कृष्ट खेलाडीले पनि नगद पुरस्कार पाउने आयोजक सहिद भीमनारायण स्मृति प्रतिष्ठानले जनाएको छ ।