राजारानीमा १६ औं जिल्ला स्तरीय राष्ट्रपति रनिङ शिल्ड खेलकुद प्रतियोगिता हुने

धनकुटा । यो वर्ष धनकुटाको चौविसे गाउँपालिकाको राजारानीमा १६ औं जिल्ला स्तरीय राष्ट्रपति रनिङ शिल्ड खेलकुद प्रतियोगिता हुने भएको छ ।

जिल्ला खेलकुद विकास समितिको आयोजनामा हुने सो प्रतियोगिताको तयारी तीव्र बनाइएको छ । सोही क्रममा हिजो चौविसे गाउँपालिकाका उपाध्यक्ष टंकमाया पाङ्मी मगरको उपस्तिथीमा तयारी बैठक बसेको छ ।

सो बैठकले यही चैत २७ र २८ गते राजारानीको पुण्य माध्यमिक विद्यालयको प्राङ्गणमा हुने १६ औं जिल्ला स्तरीय राष्ट्रपति रनिङ शिल्ड खेलकुद प्रतियोगिताको तयारीको विषयमा छलफल गरिएको छ । धनकुटा सदरमुकाममा मात्रै हुने जिल्ला स्तरीय राष्ट्रपति रनिङ शिल्ड खेलकुद प्रतियोगिता अघिल्लो वर्षदेखि सदरमुकाम बाहिरका पालिकामा गर्न थालिएको छ ।

अघिल्लो वर्षको माघ २७ र २८ गते महालक्ष्मी नगरपालिकाको दमारमा १५ औं जिल्ला स्तरीय राष्ट्रपति रनिङ शिल्ड खेलकुद प्रतियोगिता भएकोमा यो वर्ष चौविसेको राजारानीमा गरिने जिल्ला खेलकुद विकास समिति धनकुटाका अध्यक्ष मनोज कुमार राईले बताए ।

१५ औं जिल्ला स्तरीय राष्ट्रपति रनिङ शिल्ड खेलकुद प्रतियोगिताको महालक्ष्मी नगरपालिकाले संयोजन गरेकोमा यो वर्ष चौविसे गाउँपालिकाले संयोजन गर्दैछ । पालिकाले वडा नं. ८ का वडाध्यक्ष धनबहादुर लिम्बुको संयोजकत्वमा खेलकुद विकास समितिसमेत बनाइसकेको छ ।

१६ औं जिल्ला स्तरीय राष्ट्रपति रनिङ शिल्ड खेलकुद प्रतियोगितामा एथलेटिक्स, महिला पुरुष भलिवल, कराते, तेक्वाण्डो र उस्सु खेल समावेश गरिने छ । यो प्रतियोगितामा सात वटा पालिकाबाट ४२० जना खेलाडी सहभागी हुनेछन् । अहिलेसम्म धनकुटा नगरपालिकाबाहेक सबै पालिकाले खेलाडी छनौट गरिसकेका छन् ।