पुजाको प्रसादले बनायो ६० जना बिरामी, बिरामीको स्थानीय क्लिनिकमा उपचार

विर्तामोड । झापाको अर्जुनधारामा पूजाको प्रसाद खाँदा ६० भन्दा बढी बिरामी भएका छन् ।

अर्जुनधारा नगरपालिका ९ की खरबन्दीकी रिता निरौलाको बुधबार घरमा लगाएको पूजाको प्रसाद खाँदा उनको घरमा आएका पाहुना र टोलवासी बिरामी भएका हुन् । पूजामा गएर प्रसाद खाने ६० भन्दा जना भन्दा बढी बिरामी भएको वडाध्यक्ष भीष्म मिश्रले बताए । पूजामा गएकाहरूले सब्जी र रोटी अचार खाएका थिए ।

प्रसादी खाने सबै बिरामी परेको स्थानीय विद्या कटवालले जानकारी दिइन् । उनका अनुसार पूजा घरमा पुगेर प्रसाद खाने धेरै बिरामी छन् । घरमा ल्याएको प्रसाद खाने पनि बिरामी भएका छन् । ‘पूजा घरमा पुगेर सब्जी र रोटी अचार खाने धेरै बिरामी छन् । घरमा ल्याएको प्रसाद खानेहरुलाई पनि समस्या छ’, उनले भनिन् ।

सब्जी अजार र रोटी खानेहरू अधिकांशलाई डायरिया र बान्ता भएको छ । केहीलाई ज्वरो समेत आएको अध्यक्ष मिश्रले बताए । बिरामी भएकाहरूलाई स्थानीय क्लिनिकहरूमा राखिएको छ । पूजाको प्रसादीमा फुड पोइजनिङ हुँदा गाउँ नै बिरामी परेको अध्यक्ष मिश्रले बताए ।

मिश्रका अनुसार गाउँका स्थानीय र पूजाका लागि पाहुना आएका आफन्त गरी ५५र६० जना बिरामी भएका छन् । बिरामीको स्थानीय क्लिनिकमा उपचार भइरहेको छ ।