दबाब र प्रभावमा दिन थालियो सार्वजनिक विदा, ‘जनयुद्ध दिवस’ मा सार्वजनिक बिदा

काठमाडौं । पछिल्लो समयमा सार्वजनिक विदा दवाव र प्रभावमा दिन थालिएको छ । पुस २७ गते मात्रै राष्ट्रिय प्रजातन्त्र पार्टीको दवावमा परेर सावैजनिक विदा दिएको सरकारले फेरि प्रधानमन्त्रीको प्रभावमा परेर भोली अर्थात् फागुन १ गते सार्वजनिक विदा दिने भएको छ ।

आइतबार बसेको मन्त्रिपरिषद् बैठकले सोमबार ‘जनयुद्ध दिवस’को सन्दर्भमा देशभर सार्वजनिक बिदा दिने निर्णय गरेको हो । २०५२ फागुन १ गतेबाट सुरू भएको सशस्त्र युद्ध २०६३ मंसिर ५ गते विस्तृत शान्ति सम्झौतामा रूपान्तरण भएको थियो ।

त्यही युद्धको जगमा नेपालमा राजनीतिक परिवर्तन सम्भव भएको थियो भने गणतन्त्र, संघीय प्रणाली, समावेशी लोकतन्त्र, सामाजिक न्यायजस्ता उपलब्धि सशस्त्र युद्ध र जनआन्दोलनको बलमा नै स्थापित भएका थिए । सो सशस्त्र युद्ध को नेतृत्वकर्ता पार्टी नेकपा माओवादी केन्द्रले प्रत्येक वर्ष फागुन १ गतेलाई ‘जनयुद्ध दिवस’ को रूपमा मनाउँदै आएको छ ।

यसपटक भने माओवादीकै नेतृत्वको सरकार भएको मौकामा सरकारले सार्वजनिक बिदा दिने निर्णय गरेको हो । साता अघिमात्रै प्रधानमन्त्री पुष्पकमल दाहालले सार्वजनिक बिदा धेरै भएको भन्दै बिदा कटौती गर्नुपर्ने भनेका थिए । तर, आफ्नै अभिव्यक्ति प्रतिकूल हुने गरी प्रधानमन्त्री दाहालले विगतमा नदिइएको सार्वजनिक बिदा थप गराएका हुन् ।

माघ १२ देखि २२ गतेसम्म चलेको माओवादी स्थायी समिति बैठकले भने माओवादी नेतृत्व भएका स्थानीय सरकारहरुले अभियानका रुपमा ‘जनयुद्ध दिवस’ मनाउने व्यवस्था मिलाउने निर्णय गरेको थियो ।

उक्त निर्णय अनुसार माओवादी विजयी भएका कतिपय स्थानीय तहका अलावा कर्णाली र बागमती प्रदेश सरकारले १ फागुनमा बिदा दिने निर्णय गरिसकेका छन् । अहिले संघीय सरकारकै नाममा बिदा घोषणा गरिएको छ । यस्तो निर्णय गर्नु ५ दिनअघि भने प्रचण्ड आफैँले सार्वजनिक बिदा धेरै हुँदा सेवाप्रवाह प्रभावित भएको बताउँदै यसमा पुनर्विचार गर्नुपर्ने बताएका थिए ।

२४ माघमा बसेको प्रजातन्त्र दिवस मूल समारोह समितिको बैठकमा बोल्दै उनले विदामा पुनर्विचारको आवश्यकता औँल्याएका थिए । ‘हाम्रा सरकारी बिदाहरु धेरै भए, यसले जनताका काम गर्ने समय कम भएको छ, सेवा प्रवाहमा समस्या देखिएको छ’ उनले भनेका थिए, ‘यसबारे पुनर्विचार आवश्यक छ भनेर हामीले मन्त्रिपरिषद्मा पनि छलफल गरेका छौँ, गृहकार्य गरेर पुनर्विचार गर्नुपर्छ ।’