राष्ट्रियसभा उपाध्यक्ष अर्यालले लिइन् शपथ, प्रभावकारी भूमिका निर्वाह गर्ने प्रयास प्रतिवद्धता

काठमाडौं । नवनिर्वाचित राष्ट्रियसभा उपाध्यक्ष उर्मिला अर्यालले पद तथा गोपनियताको शपथग्रहण गरेकी छिन् । राष्ट्रियसभा अध्यक्ष गणेशप्रसाद तिमिल्सिनाले उपाध्यक्ष अर्याललाई सपथग्रहण गराएका हुन् ।

राष्ट्रपति विद्यादेवी भण्डारी र प्रधानमन्त्री पुष्पकमल दाहाल ‘प्रचण्ड’को उपस्थितिमा अध्यक्ष तिमिल्सिनाले उपाध्यक्ष अर्याललाई सपथग्रहण गराए । सो कार्यक्रममा उपराष्ट्रपति नन्दबहादुर पुन, सभामुख देवराज घिमिरे लगायतको उपस्थिति थियो ।

अर्यालको मात्रै उम्मेदवारी परेपछि सोमबार अर्याललाई निर्विरोध निर्वाचित गरिएको थियो । तत्कालीन उपाध्यक्ष शशिकला दाहालको कार्याकाल सकिएपछि एक वर्षदेखि उपाध्यक्षको पद खाली रहँदै आएको थियो ।

नवनिर्वाचित अर्यालले संसद्मा प्रभावकारी भूमिका निर्वाह गर्ने प्रयास गर्ने बताएकी छन् । मंगलबार पद तथा गोपनीयताको शपथलगत्तै पद बहालीपछि उपाध्यक्ष अर्यालले यस्तो बताएकी हुन् । ‘सके जति प्रभावकारी भूमिका निर्वाह गर्छु । सांसदहरूसँग पनि सहकार्य गर्दै अघि बढ्नेछु’, उपाध्यक्ष अर्यालले भनिन् ‘सङ्घीय संसद्मा महिला सांसदहरूको भूमिका पनि प्रभावकारी बनाउनुपर्नेछ ।’