युवा भनेका देशका आधारस्तम्भ हुन्ः मुख्यमन्त्री पौडेल

काठमाडौँ । वाग्मती प्रदेशका मुख्यमन्त्री डोरमणि पौडेलले युवा देशका आधारस्तम्भ भएको बताएका छन् । युवा परिषद्द्धारा आयोजित दोस्रो प्रदेश युवा सम्मेलनमा मुख्यमन्त्री पौडेलले युवाहरु नवीन चेतना र विचारका सम्वाहक एवं परिवर्तनका अग्रगामी दस्ता भएको उल्लेख गरे ।

भिडियो सम्बोधनमार्फत उनले नेपालको राजनीतिक परिवर्तनमा युवाहरुले निर्वाह गरेको भूमिका आफैँमा अद्वितीय रहेको भन्दै युवाहरुको सङ्घर्ष, त्याग र बलिदानकै जगमा लामो समयदेखि विद्यमान राजनीतिक सङ्क्रमणकाल अन्त्य भई राष्ट्र समृद्धिको युगमा प्रवेश गरेको बताए । विगतमा राजनीतिक मुद्दाको उल्झनमा विकास र सम्बृद्धिको मुद्धा पछाडि परेको यथार्थ सबैमाझ छर्लङ्ग रहेको उनको भनाइ थियो ।

उनले संविधानका उपलब्धिलाई संस्थागत गर्दै जनतालाई परिवर्तनको अनुभूति गराउन हिजोका प्रवृत्ति र कायशैलीबाट उठेर नयाँ शिराबाट अघि बढ्नुको विकल्प नरहेको धरणा राखे । मुख्यमन्त्री पौडेलले सरकारले अँगाल्ने नीति तथा तय गरेका कार्यक्रमहरुले त्यसको झल्को दिन सक्नुपर्ने भन्दै प्रदेश सरकारका नीति तथा कार्यक्रम यसै दिशामा केन्द्रीत रहेको बताए ।

कोरोना महामारीका कारण हजारौं युवाहरु रोजगारीबाट विमुख भएको उल्लेख गर्दै उनले भने, “विदेशमा श्रम गर्न गएका युवाहरु फर्किनु परेकाले आश्रित परिवारमा जीविकाको चिन्ता र भय थपिएको छ । विदेशबाट फर्र्किएका युवालाई श्रम र उत्पादनमा जोड्दै तथा स्वदेशमै कर्म गरिरहेका युवालाई राहत तथा प्रोत्साहनका प्याकेजहरुमार्फत युवा पलायनलाई रोक्ने गरी योजना, कार्यक्रम ल्याउने छौँ ।

मुख्यमन्त्री पौडेलले पछिल्लो समय पढे लेखेका तथा विषयविज्ञ युवाहरुसमेत राम्रो अवसरका लागि पलायन हुने समस्यालाई सम्बोधन गर्न उनीहरुको ज्ञान एवं विषय विज्ञतालाई स्वदेशमै उपयोग हुने अवस्था सिर्जना गर्नुपर्ने धारणा राखे । उनले अदक्ष एवं अर्धदक्ष युवालाई सीप विकास तालिमको अवसर प्रदान गरी स्वदेशमै रोजगारी सिर्जना गर्न प्रदेश सरकारले युवा लक्षित नीति तथा कार्यक्रममा जोड दिएको उल्लेख गरे ।