संघीयता अर्कैले बोकाइदिएको भारी हो : अध्यक्ष केसी

काठमाडौं । राष्ट्रिय जनमोर्चाका अध्यक्ष चित्रबहादुर केसीले संघीयता अर्कैले बोकाइदिएको भारी भएको बताएका छन् । राष्ट्रिय जनमोर्चाले शनिबार काठमाडौंको शान्तिबाटिकामा आयोजना गरेको विरोध सभालाई सम्बोधन गर्दै अध्यक्ष केसीले संघीयता अर्कैले बोकाइदिएको भारी भएको उल्लेख गर्दै भारी बिसाउन प्रमुख दलका नेताहरुसंग आग्रह गरेका हुन् ।

यस्तै अध्यक्ष केसीले नेपाल बचाउने हो भने संघीयता खारेजीको विकल्प नरहेको समेत बताएका छन्। प्रदेश सरकार कामकाजी नभएर आर्थिक बोझ मात्र थोपरेकोले प्रदेश सरकार खारेज गर्नुपर्ने अध्यक्ष केसीले बताए । प्रदेश सरकार खारेज गरेर स्थानीय तहलाई अझै मजबुत र अधिकारयुक्त बनाउनु पर्नेपनि उनले बताए ।

नेता केसीले नेपाललाई सिक्किमीकरण गर्न फेरि नागरिकता संशोधन विधेयक ल्याइएको भन्दै नागरिकतामा कडाई गर्न र विदेशीले लिएका नेपाली नागरिकताको छानविन गरी खारेज गर्न माग गरे ।

उनले हालै अमेरिकाले भेनेजुयलामाथि गरेको हस्तक्षेप विरुद्ध सरकारले आवाज उठाएकोमा धन्यवाद दिए। उनले विदेशी हस्तक्षेप र दबाबविरुद्ध अडिग रहन पनि सत्तारुढ दललाई सुझाव दिए। नेता केसीले भने, ‘प्रचण्डले पनि कहिलेकाहीँ झुक्किएर ठिकै कुरा गर्छन्। भेनेजुयलाको बारेमा ठिक कुरा गरेका छन् ।

तर, उनी कति अडिग रहन्छन् भन्ने कुरा हामीलाई थाह छ। कतिपय बुद्धिजिवी भनिनेहरुले प्रचण्ड र सरकारको विज्ञप्तिपछि नेपाल अमेरिका सम्बन्ध बिग्रियो भनेर चिच्याएपछि प्रचण्डहरुलाई अहिले ‘डर नहीँ लग्ता हे थरथरी लग्ता हे’ भइरहेको छ।’

केसीले डा। गोविन्द केसीका मागप्रति समर्थन आफ्नो रहेको बताउँदै अनसन तोडेकोमा पनि धन्यवाद दिए। ‘डा। केसीलाई ठुला भनिने पार्टीहरुले छिट्टै मरोस् भन्ने चाहन्छन्।’ केसलिे भने, ‘तर उनले अनसन तोडेर ठिक गरेका छन्। बाँचेरै संघर्ष गर्नुपर्छ।’ अध्यक्ष केसीले कांग्रेसले डा। केसीलाई समर्थन गरेजस्तो गरेर आफ्नो राजनीतिक दुनो मात्रै सोझ्याएको आरोप पनि लगाए।

उनले अहिलेको सरकार कम्युनिष्ट सरकार नभएको बताउँदै सत्तारुढ दललाई आफ्नै नाम ‘नेकपा’ घाँडो भइरहेको दाबी पनि गरे। राष्ट्रिय जनमोर्चाले ‘संघीयताको खारेजी, राष्ट्रिय विखण्डन र प्रतिगमनको खतरा विरुद्ध संघर्ष गरौं, महंगी, भ्रष्टाचार, हत्या हिंसाको अन्त्य गरौं’ भन्ने नाराका साथ शनिबार देशब्यापी प्रदर्शन गरेको हो।