मन्दिरको प्रसाद खाँदा ११ जनाको मृत्यु

काठमाडौं । भारतको एक मन्दिरको प्रसाद खाँदा ११ जनाको मृत्यु भएको छ ।

किच्चुकुट्टी मारम्मा मन्दिरमा गरिएको विशेष कार्यक्रमको प्रसाद खाने अन्य ७० जना बिरामी भएका छन् । उनीहरुको विभिन्न अस्पतालमा उपचार भइरहेको छ ।

तीमध्ये ११ जनाको अवस्था गम्भीर रहेको प्रहरीले जनाएको छ । प्रसादका रुपमा बाँडिएको भात र गोलभेंडा खानेहरु बिरामी परेका थिए । प्रसाद खाए लगत्तै उनीहरुमा पेट दुख्ने र वान्ता हुने समस्या देखिएको थियो ।

घटनापछि प्रहरीले प्रसादको नमूना संकलन गरेर जाँचका लागि पठाएको छ ।