विद्यालय व्यवस्थापन समितिको बैठकमा प्रधानाध्यापक कुटिए

काठमाडौ‌ । विराटनगरको एक विद्यालयमा शिक्षकहरुबीच कुटाकुट भएको छ । विद्यालय व्यवस्थापन समितिको बैठकमा शिक्षकहरुद्वारा प्रधानाध्यपक कुटिएका हुन् ।

विराटनगर–१४ स्थित जनता बाल आधारभुत विद्यालयका प्रधानाध्यापक सुरेन्द्रकुमार यादवलाई सोहि विद्यालयका पुर्व प्रधानाध्यापक एवम राहत शिक्षक समेत रहेका बिरेन्द्र यादवको समुहले कुटपीट गरेको हो।

पीडित यादवले शनिबार नेपाल पत्रकार महासंघ मोरङमा पत्रकार सम्मेलनको आयोजना गरी आफूमाथि कुटपिट भएको जानकारी गराएका थिए ।

यादवले विराटनगर महानगरले विद्यालयमा दरबन्दीको शिक्षक कार्यरत रहेको अबस्थामा राहत शिक्षकलाई प्रअ बस्न नमिल्ने पत्राचार गरेपछि विद्यालय व्यवस्थापन समिति, अभिभावक संघ र शिक्षकहरुको बैठकले आफूलाई प्रअ तोकेर बिरेन्द्रलाई प्रअबाट हटाएको रीसइवीले कुटपिट गरिएको बताए।

शुक्रबार ब्यवस्थापन समितिको बैठक बसिरहेको अवस्थामा पूर्व प्रअ बिरेन्द्र यादव, उनका भाई सुरेन्द्र यादव र रबिन्द्र, छोरा सुधिर र विशाल र साजन ऋषिदेवले कुटपिट गरेको पीडित यादवले जानकारी दिए।

कुटपिट गर्ने बिरेन्द्र र उनका भाइ सुरेन्द्र सोहि विद्यालयमा राहत शिक्षकमा कार्यरत छन्। भाटा र मुक्का प्रहार गर्दै गरिएको कुटपीटका कारण आफ्नो जिउभरि निलडाम बसेको र लुगा पनि च्यात्तिएको पीडित यादवले बताए।