वडाध्यक्षलाई भोट नदिँदा दलितको बृद्धभत्ता नै गायव !

कञ्चनकपुर । कतै जनप्रतिनिधि विजुली चोरेको आरोपमा पक्राउ पर्छन् । कतैका जनप्रतिनिधि भने आफुलाई भोट नदिएको वहानमा बृद्धबृद्धाले पाउँदै आएको वृद्ध भत्ता नै रोक्छन् । यस्तो हुँदा जनप्रतिनिधिको कसरी विश्वास गर्न सकिएला र ?

कञ्चनपुरको कृष्णपुर नगरपालिका –१, बण्डकी ७४ वर्षीया किथ्थी लुहारले ०६५ बाट बृद्ध भत्ता पाउँदै आएकी थिइन् । तर, उनले झण्डै एक वर्षदेखि नै पाएकी छैनन् । उनले त्यसरी बृद्ध भत्ता नपाउनुको एउटै मात्र कारण भनेको वडाध्यक्षलाई भोट नदिनु ।

उनले २०७४ असार २० मा भत्ता पाए पनि त्यसपछिका २ चौमासिकको ८ हजार रकम पाएकी छैनन् । उनले आफुले किन बृद्धभत्ता पाइनन् भन्ने अहिलेसम्म भेउ पाएकी छैनन् । उनले वडाध्यक्षले आफुलाई भोट नदिएको भन्दै भत्ता रोकेको सुनेकी मात्रै छन् ।

वडाध्यक्ष मोहन बस्नेतले चुनावका बेला भोट नदिएको भन्दै बृद्ध भत्ता रोकेको आरोप लुहारको छ । त्यति मात्रै होइन, वडाध्यक्ष बस्नेतले कृष्णपुर नगरपालिका –१, बण्डका केही दलित परिवारले चुनावका बेला भोट नदिएको आरोपमा बृद्धभत्ता रोकेको बताइएको छ ।

बण्डकी कै घुइरे पार्कीले पनि बृद्धभत्ता नपाएको त्यति नै भयो, जुनबेला वडाध्यक्ष बस्नेत बने । बसनेतले पहिले नै आफुलाई भोट नदिए बृद्ध भत्ता नदिने धम्की दिएको घुइरे पार्कीकी श्रीमती कमला पार्की बताउँछिन् ।

वडा कार्यालयले सामाजिक सुरक्षाका नाममा वितरण गर्ने बृद्धभत्ता वडाभित्रका सबै बृद्धबृद्धालाई अहिलेसम्मकै वितरण गरिसकेको छ । सोही वडाका दलित परिवारले भने अहिलेसम्म पाएका छैनन् ।

दलित परिवारलाई वृद्धभत्ता रोकिएकोमा कतै विरोध नभएको पनि होइन । ३० चैत २०७४ मा केहि दलित समुदायका ज्येष्ठ नागरिकलाई भत्ता नदिएपछि कृष्णपुर नगरपालिकाका मेयरका उम्मेद्वारसमेत रहेका हरी टमटा लगायतले भत्ता बितरण स्थलमै बिरोध जनाए । त्यसरी विरोध जनाउँदा उनीहरु प्रहरीको फन्दामा परेका थिए । उनीविरुद्ध सार्वजनिक मुद्धा चरिहेको छ । उनी हिरासतमै छन् ।

टमटाले वडाध्यक्षमाथि हातपात गरेको र सरकारी कागजात च्यात्न खोजेको आरोपमा ईलाका प्रहरी कार्यालय झलारीले नियन्त्रणमा लिई सार्वजनिक मुद्धा चलाएको हो ।

यता, वडाध्यक्ष बस्नेतले वडा कार्यालयबाट नगरपालिकामा नाम सिफारिस गरिसकेको बताएका छन् । ‘भत्ता नपाएकाहरुका विषयमा छलफल सुरु भइसकेको छ’ उनले भने, ‘छुटेकाहरुको भत्ता मिलिहाल्छ ।’