मदरसा संघद्वारा सशस्त्र गुल्मपतिलाई “कुरान सरिफ” ले स्वागत

कपिलवस्तु  । राष्ट्रिय मदरसा संघ नेपालले सशस्त्र प्रहरी राजश्व तथा भन्सार सुरक्षा गुल्म कृष्णनगरका नयाँ प्रमुखलाई स्वागत र सम्मान गरेको छ ।

गुल्मको हालै पदभार सम्हाल्नुभएका गुल्मपति सशस्त्र प्रहरी नायब उपरीक्षक महेन्द्र भारती र सशस्त्र प्रहरी निरीक्षक सत्य बुढाथोकीलाई मदरसा संघले एक कार्यक्रमका बीच स्वागत र सम्मान गरेको हो ।

मदरसा संघका केन्द्रिय अध्यक्ष अब्दुल गनी अलकूफी र महासचिव मौलाना मशहूद खाँ ‘नेपाली’ ले मुस्लिम धर्मग्रन्थ “कुरान सरिफ” प्रदान गरी सम्मान गरेका थिए ।कार्यक्रममा मदरसा संघका केन्द्रिय अध्यक्ष अब्दुल गनी अलकूफीले नेपाली सुरक्षाकर्मीले हरेक धर्म सम्प्रदायका नेपालीहरुलाई समान सुरक्षा दिएकोमा स्वदेशमा मात्र नभई विदेशमा समेत चर्चामा रहेको बताए ।

अध्यक्ष अलकूफीले साउदी, कतार जस्ता मुस्लिम देशमा समेत नेपाली सुरक्षाकर्मीको ठूलो मानप्रतिष्ठा बढेको प्रशंसा गर्दै आफ्नो आस्था र विश्वासलाई सधैं जोगाइराख्न सुझाव दिए । मदरसा संघका केन्द्रिय महासचिव मौलाना मशहूद खाँ ‘नेपाली’ले कृष्णनगर क्षेत्रमा हुने विभिन्न किसिमका अपराधिक घटनालाई न्यूनीकरण गर्न सुरक्षाकर्मीले महत्वपूर्ण भूमिका खेलेकोमा प्रशंसा गरे । साथै शान्ति सुरक्षालाई चुस्त, दुरुस्त र सौहाद्र्रपूर्ण बनाउन सुरक्षाकर्मीले अझ कदम चाल्नुपर्ने मौलाना ‘नेपाली’ले बताए ।

कार्यक्रममा नेपाल कै जेठो (१०५ वर्षे) मदरसा जामिया सिराजुल उलूम अलसल्फियाका अध्यक्ष समीम अहमद नदवीले ‘कुरान सरिफ’ को नेपाली अनुवादले इस्लाम धर्मको नेपालमा धेरै महत्व बढेको स्पष्ट पारे ।

सम्पूर्ण मुस्लिम समुदायलाई एकसूत्रमा बाँध्न महत्वपूर्ण भूमिका खेल्ने “कुरान सरिफ” ले स्वागत सम्मान गर्न पाउनु सौभाग्य भएको नदबीले बताए ।कृष्णनगर र वरपरका मुस्लिम महिलाहरुको शिक्षामा तौहिद सेन्टरले विशेष योगदान पु¥याएको सेन्टरका अध्यक्ष अब्दुल अजिम मदनीले कार्यक्रमको अवसरमा धारणा राखे ।

कृष्णनगरभित्र आपसी सद्भाव बनाएर शान्तिको अनुभुति गराउने सशस्त्र प्रहरीलाई सहभागीले धन्यबाद दिएका थिए । कृष्णनगरमा पहिलो पटक आएको बताउँदै सशस्त्र प्रहरी नायब उपरीक्षक भारतीले एउटै थलोमा सबैसँग भेटघाट हुने अवसर जुटाएकोमा मदरसा संघलाई धन्यबाद ज्ञापन गर्नुभएको थियो ।

उनले आफ्नो कार्यलाई निष्ठापूर्ण ढंगले गर्ने प्रतिवद्धता जनाए ।कार्यक्रममा कृष्णनगर स्रोत केन्द्रका स्रोतव्यक्ति अर्जुनप्रसाद लोहार, समाजसेवी दिनेशचन्द्र गुप्त, अहेब दिनेश साह, वडाध्यक्षद्वय सागिर खाँ, संजय गुप्ता, पीआरसी संयोजक भुमिराज भट्टराई, नेशनल ट्रेडिङका किफायतुल्ला खाँ लगायत नागरिक समाज तथा सामाजिक अगुवाहरुको उपस्थिति रहेको थियो ।