मौसममा क्रमिक सुधार

काठमाडौँ । विगत ५ दिनदेखि सक्रिय मनसुन आजबाट कमजोर भएसँगै मौसममा क्रमिक सुधार आएको छ ।

मनसुन कमजोर भएकाले कम बदली र वर्षात् भएको मौसम पूर्वानुमान महाशाखाले जनाएको छ । मुलुकको पूर्वी भागको १÷२ स्थान तथा पश्चिमका धेरै स्थानमा वर्षात् हुने मौसमविद् शान्ति कँडेलले जानकारी दिए ।

मनसुन बढी सक्रिय भएसँगै अरब सागर र बंगालको खाडीबाट आएको जलवाष्पयुक्त हावाको प्रभावले तीनदिन देशभर भारी वर्षात् गराएको थियो ।

उक्त प्रणाली गएरातिदेखि नै कमजोर बन्दै गएको छ । यद्यपि, आज पनि काठमाडौँ उपत्यकासहित देशका अधिकांश स्थानमा वर्षात् हुनेछ ।

अहिले देशको पूर्वी भेगमा सामान्य बदली छ भने पश्चिममा बदलीसँगै वर्षात् भइरहेको छ । काठमाडौँमा अपराह्नतिर हल्का वर्षात् हुने जनाइएको छ । आइतबार पनि मनसुनी वर्षाको गतिविधि सक्रिय रहेकाले केही स्थानमा भारी वर्षात् भएको महाशाखाले जनाएको छ ।

महाशाखाको पछिल्लो विवरणअनुसार सबैभन्दा बढी भैरहवामा २२२ मिलिमिटर वर्षात् भएको छ भने सबैभन्दा कम काठमाडौँमा तीन मिलिमिटर वर्षात् भएको छ ।

धनकुटामा ५, ताप्लेजुङमा ७, सिमरामा ३०, पोखरामा ९, दाङ र जुम्लामा १०÷१०, नेपालगञ्जमा १४, वीरेन्द्रनगरमा ३९ र धनगढीमा १६ मिलिमिटर वर्षात् भएको छ । आज काठमाडौँ उपत्यकाको अधिकतम तापक्रम २६ र न्यूनतम तापक्रम १९ डिग्री सेल्सियस रहेको छ ।