काठेपुल भाँचिदा ३ जना बालक बेपत्ता

बझाङ । घाँटखोला तर्ने क्रममा काठेपुल भाँचिदा ३ जना बालक बेपत्ता भएका छन् ।

काँडा गाउँपालिका–२ स्थित घाँटखोला तर्ने क्रममा काठेपुल भाँचिदा ३ जना खोलामा परेर बेपत्ता भएका हुन् ।

बेपत्ता हुनेमा काँडा गाउँपालिका–२ धलौनका १५ वर्षीय लोकेन्द्र बोहरा, १४ वर्षीय धिरेन्द्र बोहरा र १६ वर्षीय उज्ज्वल बोहरा रहेको प्रहरीले जनाएको छ ।

बेपत्ता ३ जनाकै खोजी कार्य जारी रहेको जिल्ला प्रहरी कार्यालयका प्रहरी नायव उपरीक्षक नरेन्द्र चन्दले बताए । खोलामा झोलुङ्गे पुल नहुँदा यहाँका स्थानीय बासिन्दा बर्सेनि अकालमै ज्यान गुमाउन बाध्य छन् ।