मोरङमा पूर्वराष्ट्रपति भण्डारी पक्षधर प्यानल नै निर्वाचित, ओलीलाई लाग्यो धक्का

विराटनगर । नेकपा एमाले मोरङमा पूर्वराष्ट्रपति विद्यादेवी भण्डारी पक्षधर प्यानल नै निर्वाचित भएको छ । जिल्लाको नेतृत्वको लागि पूर्वराष्ट्रपति भण्डारी र पार्टी अध्यक्ष केपी शर्मा ओली पक्षधर नेताहरू प्यानल बनाएरै मैदानमा उत्रिएका थिए । पूर्वराष्ट्रपति भण्डारी पक्ष प्यानलको नेतृत्व विनोद ढकालले गरेका थिए भने ओली समूहको नेतृत्व उपाध्यक्ष गुरु बरालले गरेका थिए ।

भण्डारी समूहबाट अध्यक्षका लागि अजम्बर राई र ओली समूहबाट राजकुमार ओझा अध्यक्षका उम्मेदवार थिए । तर अध्यक्षमा भण्डारी पक्षधर भनिएका राईसहित भण्डारी पक्षका नेताहरुको प्यानल नै निर्वाचित भएको हो ।

राईले ४ सय ४६ मत प्राप्त गरेका छन् । उनका प्रतिस्पर्धी ओझाले ४ सय ७ मत प्राप्त गरेका छन् । उपाध्यक्षमा सागर थापा ४ सय २२ मत प्राप्त गर्दा उनका प्रतिस्पर्धी शान्ति लिम्बू भूजेलले ३ सय ९१ मत प्राप्त गरिन् ।

सचिवमा सोमराज थापा निर्वाचित भएका छन् । उनले ४ सय ६२ मत प्राप्त गर्दा प्रतिस्पर्धी रविन थापाले ३ सय ६८ मत प्राप्त गरिन् । उपसचिवमा सन्तोष वान्तवा र उषा झा निर्वाचित भएका छन् । वान्तवाले ४ सय ९० र झाले ४ सय १८ मत प्राप्त गरिन् । योसँगै मोरङ एमालेमा स्पष्ट गुटको विकास भएको छ ।

निर्वाचन समितिले अधिवेशन सुरु भएको ७ दिनमा बल्ल मत परिणाम सार्वजनिक गरेको छ। अधिवेशनको उद्घाटनदेखि नै सहमतीय रटान लगाएका संस्थापन पक्षीय नेताहरूले कार्यकर्ता व्यवस्थापनमै बढी समय खर्चिए। संस्थापन समूहका केन्द्रीय नेताहरूले उम्मेदवार हुन लागेका कार्यकर्ताहरूलाई हप्काउने, धम्क्याउने र तर्साउने काम गरेको भन्दै अधिवेशनस्थलमा नै धेरैले आक्रोश पोखेका थिए।

संस्थापन पक्षमा पार्टी उपाध्यक्ष गुरु बराल, स्थायी कमिटी सदस्य भानुभक्त ढकाल, पार्टी प्रदेश इन्चार्ज शेरधन राई, केन्द्रीय सदस्य इन्चार्ज जीवन घिमिरे, लेखा समिति सभापति ऋषिकेश पोखरेल, प्रदेश अध्यक्ष घनश्याम खतिवडा, कोसी प्रदेशका मुख्यमन्त्री हिक्मतकुमार कार्की लगायत लागेका थिए । उनीहरूले कार्यकर्तालाई भेटेर विभिन्न आश्वासन दिँदासमेत यस समूहले हार बेहोरेको छ ।

संस्थापन इतर समूहमा विनोद ढकाल तथा केन्द्रीय सदस्यहरू रामलाल साह, युवराज बाँस्कोटा, नैनकला ओझालगायत थिए । यसले नेकपा एमालेका अध्यक्षसमेत रहनुभएका ओलीलाई ठूलो धक्का दिएको छ । मोरङ जिल्ला अधिवेशनसँगै एमालेभित्र तीव्र ध्रुवीकरण देखिएको छ ।