समयमै कानुन नबन्दा सहकारीमा समस्या आएको गुनासो

धनकुटा । पछिल्लो सममा धनकुटासहित देशभरका अधिकांस सहकारीहरु संकटमा पर्दै गएको छ । त्यसरी समयमै सहकारी नियमन र व्यवस्थापनको कानुन नबन्दा सहकारी क्षेत्रमा समस्या बढ्दै गएको धनकुटाका अगुवाहरुले बताएका छन् ।

उद्योग कृषि तथा सहकारी मन्त्रालय कोशी प्रदेशले आज धनकुटामा आयोजना गरेको पालिकास्तरीय जनप्रतिनिधि तथा सरोकारवालाहरुसँग सहकारी सम्बन्धि अन्तरक्रिया कार्यक्रममा सहभागीले समयमै कानुन नबन्दा बचतकर्ताहरुले सम स्या भोग्दै आएको बताएका हुन् ।

सो अन्तरक्रिया कार्यक्रममा उद्योग कृषि तथा सहकारी मन्त्रालयका शाखा अधिकृत तायोनाथ तिम्सिनाले सहकारीको अवस्था, अवसर, चुनौती, भावी कार्य दिशाबारे कार्यपत्र प्रस्तुत गर्दै सहकारीहरुमा संकट देखाएर चाबी लगाउँदैमा सहकारी क्षेत्रमा देखिएका संकट समाधान हुन नसक्ने बताए । उनले सहकारीहरुलाई व्यवस्थित गर्न बचतकर्ताहरु र सहकारी संचालकहरु सचेत हुनुपर्नेमा जोड दिए ।

जिल्ला समन्वय समिति धनकुटाका प्रमुख निरेन तामाङले सहकारी कानुन, शिक्षा तथा अनुगमन नहुँदा समस्या हुने गरेको बताए । ऋण लगानी र असुलीको सन्तुलननहुँदा सहकारी समस्यामा परेको उनको दाबी छ ।

सो कार्यक्रममा उद्योग कृषि तथा सहकारी मन्त्रालयका उद्योग महाशाखा प्रमुख पदम बहादुर ठकुराठीले सहकारी संस्थाहरुमा देखिएका विकृति र विसंगतिको नियमन हुन थालेको र यसले मूर्त रुप लिन लागेको बताए । उनले कोशी प्रदेशमा खासै संकटग्रस्त सहकारी नभएको दावी गरे ।

सो अन्तरक्रिया कार्यक्रममा धनकुटा नगरपालिकाका आर्थिक बिकास शाखा प्रमुख बिकास अधिकारी, जिल्ला सहकारी संघ धनकुटाका अध्यक्ष खगेन्द्र सुबेदी, स्थानीय चिरञ्जीवी दाहाल लगायतले केही सहकारीको बदमासीका कारण सबै सहकारीलाई समस्या परेको गुनासो गरे । कार्यक्रममा प्रस्तुत कार्यपत्रमाथि सञ्चारकर्मी रमेशचन्द्र अधिकारी र सहयोगी बचत तथा ऋण सहकारी संस्थाका अध्यक्ष जेपी भुजेलले टिप्पणी गरेका थिए ।