पूर्वाञ्चल गट ट्यालेन्ट सिजन–६ को फाइनल २४ गते हुने

धनकुटा । धनकुटामा भइरहेको पूर्वाञ्चल गट ट्यालेन्ट सिजन ६ को फाइनल शनिबार हुने भएको छ ।

धनकुटाको तल्लो टुढिखेलमा हुने सो फाइनलमा नृत्यतर्फ ९ जना र गायनतर्फ १० जनाले प्रतिष्पर्धा गर्ने आयोजकले जनाएको छ । नृत्यतर्फ श्रेना मगर (झापा), प्रिन्सा खत्री (सुनसरी), असुसा एण्ड आयुसा (भोजपुर), एक्सप्रेस कृउ (इलाम), बर्खा एण्ड अमिसा (धनकुटा), वर्षा राई (इलाम), हिरा भट्टराई (सुनसरी), आशिका कटुवाल (धनकुटा र सन्ध्या रत्ने (सुनसरी) ले प्रतिष्पर्धा गर्नेछन् ।

त्यसैगरी गायनतर्फ कमल राई (संखुवासभा), सिन्ध्या राई (खोटाङ), बिनोद बिक्रम राई (सोलुखुम्बु), आयुष्मा लिम्बु (मोरङ), क्षितिज मगर (सुनसरी), विपिन विश्वकर्मा (धनकुटा), माइकल राई (धनकुटा), दिनेश भारती (पाँचथर), श्रेया आचार्य (भोजपुर) र सेन्मिहाङ लिम्बु (तेह्रथुम) ले फाइनलमा प्रतिष्पर्धा गर्ने आयोजकले जनाएको छ ।

धनकुटाको रि क्रियशन मल्टि मिडिया एण्ड इन्टरटेन्मेट प्रा.लि र टिन्स क्रिउ डान्स सेन्टरले २०७३ सालदेखि पूर्वाञ्चल गट ट्यालेन्ट गर्दै आएको छ । पूर्वाञ्चल गट ट्यालेन्ट सिजन सिक्स भने असारदेखि शुरु गरेको थियो ।

प्रतियोगिताका दुबै विद्यामा प्रथम हुनेले ५ लाख नगद, ५ लाख बराबरको जीवन बिमाको प्रथम प्रिमियम, ट्रफि र गिफ्ट ह्यामपर प्रदान गरिने र दोस्रो हुनेलाई ५० हजार तेस्रो हुनेलाई २० हजार रुपैयाँसहित विभिन्न पुरस्कारको व्यवस्था मिलाइएको पूर्वाञ्चल गट ट्यालेन्टका संयोजक सुमन योगीले जानकारी दिए ।

गत असार ५ गतेबाट सुरु भएको प्रतियोगिताको सिजन–६ मा ३ सय ८९ जनाले अडिसनमा भाग लिएका थिए । कोशी प्रदेशका १४ वटै जिल्लामा विभिन्न चरणमा भएका अडिसनबाट छनौट हुँदै गायनतर्फ १० जना र नृत्यतर्फ ९ जना प्रतियोगी फाइनल पुगेको आयोजकले जनाएको छ । फाइनलमा निर्णायकबाट ५० प्रतिशत र ‘भोटिङ’ बाट ५० प्रतिशत अंक प्रदान गरी विजेता छनौट गरिने छ ।

सो प्रतियोगिताको फाइनलमा जुनी खालिङ राई, हेमु स्मृति चोङवाङ र महेश राई गायन तर्फको निर्णायक छन् भने नृत्यतर्फ युसिन यस्माली मगर, सुशान्त लिम्बू र दिपेश मगर निर्णायकको भूमिकामा रहने आयोजकले जनाएको छ । यो पटक कृष्णभक्त राई र इन्द्र सुशिल लिम्बू अतिथि निर्णायकको भूमिकामा रहने छन् ।

पूर्वाञ्चल गट ट्यालेन्टको फाइनलको पूर्वसन्ध्यामा आज धनकुटामा आयोजना गरिएको पत्रकार सम्मेलनमा संयोजक योगीले धनकुटा जस्तो ठाउँमा पनि केही गरेर देखाउन सकिन्छ भनेर पूर्वाञ्चल गट ट्यालेन्टको आयोजना गरिएको बताए ।

सो पत्रकार सम्मेलनमा टिन्स क्रिउ डान्स सेन्टरका अध्यक्ष मेनिस राई, नेपाल पत्रकार महासंघका अध्यक्ष विदुर खवास, डान्स क्रियुका उपाध्यक्ष दिपा अर्याल, सचिव मिनकुमार लिम्बु, सल्लाहकार दिनेश मगर लगायतको उपस्थित रहेको थियो ।