सोलुखुम्बुको लिखुपिके गाउँपालिकामा आगलागी, जले २ वटा शाखा

सोलुखुम्बु । सोलुखुम्बुको लिखुपिके गाउँपालिकाको विभिन्न शाखामा आगलागी भएको छ । फुर्केचौरमा गाउँपालिकाले भाडामा लिएर शाखा सञ्चालन गरेको रुदबहादुर खत्रीको ढुङ्गा, माटोले बनेको टिनको छानो भएको दुई तले घरमा आइतबार दिउँसो आगलागी भएको हो ।

सोलुखुम्बुको लिखुपिके गाउँपालिकाका २ वटा शाखा कार्यालयहरु जलेका छन् । आज दिउँसो १ बजेतिर आगलागी हुँदा गाउँपालिकाको प्रधानमन्त्री रोजगार शाखा, पूर्वाधार शाखा जलेको छ । विद्युत् सर्ट भएर आगो लागेको प्रारम्भिक अनुमान प्रहरीको छ ।

हावाहुरीले पोल ढलेकाले दुई–तीन दिनदेखि बिजुली नभएको र आजै बिजुली आउनासाथ आगो लागेर कार्यालय जलेको गाउँपालिकाकी अध्यक्ष मिना कार्की बस्नेतले बताइन् ।

स्थानीय, जनप्रतिनिधि र प्रहरीको सक्रियतामा आगो नियन्त्रणमा आएको थियो । जिल्ला प्रहरी कार्यालय सोलुखुम्बुका प्रहरी नायव उपरीक्षक (डीएसपी) द्धारिकाप्रसाद घिमिरेले क्षतिको थप विवरण संकलन भइरहेको बताए ।