चर्चित ‘टी मेकर’ को जसबीरे चिया प्रशोधन कारखाना जल्यो, ७ करोडभन्दा धेरैको क्षति

इलाम । इलामको जस्बीरेमा सञ्चालनरत जसविरे चिया प्रशोधन कारखानामा आगलागी भएको छ ।

मंगलबार राति नौ बजे भएको आगलागीमा उद्योगमा रहेका चिया प्रशोधनमा आवश्यक पर्ने मेसिन, प्रशोधन गरेर बिक्रीका लागि तयार गरिएको चिया लगायत जलेर नष्ट भएका छन् भने झण्डै ७ करोडभन्दा धेरैको क्षति भएको छ ।

कारखानाका सञ्चालक शरद सुब्बाले आफू कारखानाको काम सकेर फर्केपछि आगो लागेको जानकारी दिए । यद्यपि आगलागीको कारण भने खुल्न सकेको छैन । जसबीरे चिया प्रशोधन कारखाना पूर्वी नेपालका पूराना चिया उद्योगमध्येको एक हो । कारखानाले किसानको अर्ग्यानिक चिया पत्ती खरिद गरेर समेत प्रशोधन गर्दै आएको थियो । कारखानामा सल्केको आगो दमकल, स्थानीय र प्रहरीको सक्रियतामा बिहान साढे तीन बजे नियन्त्रणमा लिइए पनि अहिलेसम्म धुँवा उडिरहेको छ ।

कारखानाका सञ्चालक सुब्बा हुन् । सुब्बा नेपालकै सबैभन्दा उत्कृष्ट चिया बनाउने कौशल भएका ‘टी मेकर’ हुन् । केही महिनाअघि काठमाडौंमा आयोजित ‘नेपाल टी च्यालेन्ज २०२४’ मा नेपालका चिया उत्पादकहरूबीचको प्रतिस्पर्धामा उनी नेपालकै ‘सर्वोत्कृष्ट टी मेकर’ घोषित भएका थिए ।

चिया खरिद गर्न मात्र होइन, चिया उत्पादनबारे अध्ययन गर्न पनि स्वदेशी एवं विदेशीहरु जसवीरे चिया प्रशोधन केन्द्र पुग्ने गरेका थिए । त्यहाँ उत्पादित चिया अमेरिका, डेनमार्क, नेदरल्यान्डलगायतमा निर्यात हुँदै आएको थियो । उद्योगबाट बर्सेनि ३० हजार किलोसम्म चिया उत्पादन हुन्थ्यो । स्थानीय किसानहरुका लागि पनि सो कारखाना आयआर्जनको मुख्य केन्द्र थियो । जुन कारखानामा प्रशोधन गरेर तयार गरिएको चियापत्ति देश विदेशसम्म निर्यात हुने गर्थ्यो ।

बुधवार बिहान आगलागी प्रभावित क्षेत्रमा इलाम नगरपालिकाका मेयर केदार थापा सहितका जनप्रतिनिधिले अवलोकन गरेका छन् । आगलागीका कारण ७ करोड बढीको क्षति भए पनि विवरण यकिन हुन सकेको छैन । बिहानै घटनास्थल पुगेको प्रहरी टोलीले क्षतिको विवरण संकलन गरिरहेको जिल्ला प्रहरी कार्यालय इलामले जनाएको छ ।