फुलचोकी जंगलबाट बाटो बिराएका १३ जना आए सम्पर्कमा, खोजी कार्य जारी

काठमाडौं । ललितपुरको गोदावरी नगरपालिकामा पर्ने फुलचोकी जंगलबाट हराएका १३ जना व्यक्ति सम्पर्कमा आएका छन् । सोमबार फूलचोकीमा घुम्न गएका १३ जना व्यक्ति हराएको सूचनापछि अहिले खोजी कार्य थालिएको थियो ।

फुल्चोकीमा प्रत्येक वर्ष हिउँ खेल्ने, हाइकिङ जाने र गोदावरी पिकनिक जाने युवकयुवती हराउने गरेका छन् । बाटो बिराएका १३ जनामध्ये १० पुरुष र तीन महिला रहेका छन् ।

सोमबार साँझ ५ बजे उनीहरूले प्रहरीलाई आफूहरूले बाटो बिराएको भनी उद्धार गर्न खबर गरेको प्रहरीले जनाएको छ । लगत्तै प्रहरी प्रभाग बाडेगाउँका प्रहरी निरीक्षक अस्मिता कपालीको नेतृत्वमा ५ जना र स्थानीय एक जनाको टोलीले खोजी कार्य जारी राखेको ललितपुर प्रहरीले जनाएको छ ।

जिल्ला प्रहरी परिसर ललितपुरका प्रवक्ता प्रहरी उपरीक्षक नवरत्न पौडेलले बाटो बिराएका उनीहरू सम्पर्कमा रहेको र प्रहरीले खोजी जारी राखेको बताएका छन् ।

यसअघि पनि यो जंगलमा घुम्न जानेहरू पटक पटक हराएका थिए । फुल्चोकी काठमाडौँ उपत्यकाकै अग्लो स्थान भएकाले घुमफिर गर्न जाने गरेका छन् । फूलचोकी डाँडामा हिँउदेयाममा घुम्न जानेहरूको भिड लाग्ने गर्छ । २७६१ मिटर अग्लो रहेको यो डाँडा काठमाडौं उपत्यका घेर्ने सबैभन्दा अग्लो डाँडा हो