फुलचोकी जंगलबाट हराएका १३ जनाको खोजी कार्य शुरु, यो जंगलमा हराउँछन् पटक पटक

काठमाडौं । ललितपुरको गोदावरी नगरपालिकामा पर्ने फुलचोकी जंगलबाट १३ जना व्यक्ति हराएका छन् । सोमबार फूलचोकीमा घुम्न गएका १३ जना व्यक्ति हराएको सूचनापछि अहिले खोजी कार्य थालिएको छ ।

यसअघि पनि यो जंगलमा घुम्न जानेहरू पटक पटक हराएका थिए । फुल्चोकी काठमाडौँ उपत्यकाकै अग्लो स्थान भएकाले घुमफिर गर्न जाने गरेका छन् । फूलचोकी डाँडामा हिँउदेयाममा घुम्न जानेहरूको भिड लाग्ने गर्छ । २७६१ मिटर अग्लो रहेको यो डाँडा काठमाडौं उपत्यका घेर्ने सबैभन्दा अग्लो डाँडा हो ।

सोमबार दिउँसो फुलचोकी पुगेका १३ जना हराएको जानकारी आएको जिल्ला प्रहरी परिसरका प्रवक्ता एसपी नवरत्न पौडेलले जानकारी दिए । स्थानीयको सहयोगमा प्रहरी परिचालन गरेर हराएका व्यक्तिहरूको खोजी कार्य चलिरहेको छ । ‘१३ जना व्यक्ति हराएको सूचना आएको छ,’ प्रवक्ता पौडेलले भने, ‘लगत्तै हामीले इन्सपेक्टरको कमाण्डमा टोली खटाएका छौं ।’